As nosas tecnólogas volven aos colexios de Santiago na procura de novas fichaxes
mércores, 30 de setembro do 2020
As
mulleres científicas e tecnólogas da nosa terra piden paso e, nesta
liña de avance, queren tirar abaixo todas as barreiras que poidan
impedir ás mozas abordar o mesmo camiño e prepararse para ser, elas
tamén, mulleres científicas e tecnólogas. Desta
vontade xorde a iniciativa Unha enxeñeira ou científica en cada
cole, que chega á súa quinta edición impulsada pola Oficina de
Igualdade de Xénero da Universidade de Santiago e o máis o
Concello. O obxectivo, nas súas palabras, “motivar a presenza
de rapazas nas titulacións relacionadas coas denominadas disciplinas
STEM”. Ou sexa, nas áreas relacionadas coa Ciencia, a Tecnoloxía,
a Enxeñaría e as Matemáticas.
Os
obradoiros correspondentes á quinta edición botaron a andar este
martes no CEIP López Ferreiro de Santiago de Compostela a través do
taller Informática visual aplicada á bioloxía. A actividade
foi impartida por Eva Cernadas, profesora da USC na Área de Ciencia
da Computación e Intelixencia Artificial e investigadora do Centro
Singular de Investigación en Tecnoloxías Intelixentes (CiTIUS).
A
iniciativa Unha enxeñeira ou científica en cada cole está
dirixida ao alumnado dos centros de educación Infantil e
Primaria públicos do concello compostelán nos meses de setembro a
outubro. Dadas as circunstancias da pandemia da COVID-19, os
obradoiros desta edición foron reformulados en modalidade virtual a
través de webinars, vídeos e materiais didácticos diversos.
No programa participan nenas e nenos de cuarto, quinto e sexto de
primaria do CEIP López Ferreiro, CEIP Mestre Rodríguez Xixirei,
CEIP Raíña Fabiola e CEIP de Vite I.
Programa
Tamén
no CEIP López Ferreiro, impartirase o obradoiro Coas mates
pódense gardar segredos, o cal correrá a cargo de Elena Vázquez
Abal, profesora da Área de Xeometría e Topoloxía da USC, os días
30 de setembro e 1 de outubro. A profesora impartirá este mesmo
obradoiro no CEIP de Vite I e no CEIP Raíña Fabiola os días 8 e 9
de outubro. O CEIP Mestre Rodríguez Xixirei acollerá o 5 de outubro
o taller Falando cos superordenadores, impartido por Mª José
Rodríguez Malmierca e Natalia Costas, investigadoras do CESGA. O
mesmo taller desenvolverase no CEIP Raíña Fabiola o 5 de outubro.
Finalmente, no CEIP de Vite I, o 7 de outubro, impartirase a
actividade de divulgación Xogando coa luz, impartido por
Maite Flores Arias, profesora da Área de Óptica da USC.