As nosas empresas amosan en xullo o seu potencial para crear unha gran factoría de drons
martes, 30 de xuño do 2015
O
proxecto para crear un polo industrial para a fabricación de
compoñentes de drons na nosa terra, proceso
que avanzamos hai un mes dende Código Cero, segue adiante e
semella que a bo ritmo. Segundo fixo saber este luns o Goberno
galego, o polo industrial (que vai estar emprazado nas Rozas) será
o obxecto o mes vindeiro dunha xuntanza multilateral para amosar en
detalle o que están dispostas a facer ao abeiro deste polo as nosas
empresas tecnolóxicas. A cita será os días 20 e 21 de xullo a
Cidade da Cultura e o obxectivo é reunir a todas as empresas que
teñen manifestado o seu interese en participar no proxecto de avións
non tripulados, “tanto para ser escollidas como socio tecnolóxico
da Xunta, como para tomar parte nos procesos de compra pública
innovadora que se levarán a cabo o ano que vén”.
A
xuntanza permitirá, en palabras da Axencia Galega da Innovación,
explicar os requisitos da iniciativa, afondando nas posibilidades que
ofrecen os avións non tripulados no desempeño de servizos públicos
como a vixilancia forestal, o control de recursos pesqueiros ou o
salvamento marítimo. De feito, explica a axencia, as empresas que
compitan polo contrato deberán acreditar a capacidade precisa para
investigar a aplicación dos sistemas aéreos non tripulados de uso
civil a este tipo de retos”.
As
dúas xornadas tamén serán “unha ocasión inmellorábel para que
as empresas e os centros de investigación galegos establezan
alianzas cos candidatos a socio tecnolóxico do polo de cara a
presentar as mellores ofertas”, engádese. Para participar no
obradoiro, os interesados deben enviar cuberta, ao enderezo
programas.gain@xunta.es, a
solicitude de manifestación de interese, cuxo prazo de presentación
vense de ampliar ata o 30 de xuño ante o gran número de peticións.
Na
cita, as firmas terán á súa disposición “un espazo expositivo
no que amosar e dar a coñecer os seus novos avances tecnolóxicos”.
Ademais, celebraranse reunións de traballo destinadas a amosar
puntos de vista e posibilidades futuras de cooperación ao abeiro do
devandito polo industrial. Polo que atinxe á propia contorna das
Rozas, está prevista nas súas instalacións unha visita para
expoñer diante das empresas participantes os labores que se
desenvolven ao abeiro do Centro de Investigación Aerotransportada.