As mulleres tecnólogas dos campus coruñeses rompen desigualdades coa web UDCientíficas
luns, 7 de febreiro do 2022
Na
mañá deste 7 de febreiro a Universidade e o Concello da Coruña
presentaron na Reitoría un recurso web que pon o foco en visualizar,
reivindicar e promover as importantes contribucións das mulleres que
traballan no seo dos campus coruñeses facendo avanzar a ciencia e a
tecnoloxía. Estamos a falar do portal
UDCientíficas, que ten o obxectivo extra, coincidindo coa
celebración do Día Internacional das Mulleres e as Nenas na
Ciencia, este 11 de febreiro, de “avanzar na loita contra as
desigualdades de xénero”.
Na
presentación participaron a
vicerreitora de Igualdade, Cultura e Deporte, Cristina López, xunto
coa concelleira de Benestar Social, Participación e Igualdade da
Coruña, Yoya Neira, e a directora do Centro de Estudos de Xénero e
Feministas, Teresa Piñeiro.
Xuntas
explicaron que esta iniciativa pretende “dar visibilidade pública
do traballo realizado polas investigadoras da UDC, a través dun
portal web que recolle o perfil das profesoras con datos do seu labor
investigador e de contacto”.
O
directorio nace coa participación de 157 profesoras que teñen a súa
ficha na web, cifra que, segundo a directora do CEXEF, esperan
duplicar ao longo deste ano.
A
páxina artéllase arredor de áreas de coñecemento, especialidades
e liñas de investigación, “unha información que vai facilitar a
busca de mulleres expertas nun tema concreto a través de palabras
chave”, explicaron, engadindo que cada unha das fichas de expertas
ten unha ligazón ao seu perfil na plataforma do ámbito científico
ORCID, á súa páxina de persoal docente e investigador da
Universidade da Coruña e ao seu Google Scholar. “Trátase de tres
recursos externos que están en continua actualización e que
permiten ter unha idea optimizada da especialización
docente-investigadora de cada unha das expertas”, fixeron saber.
Segundo
manifestou Teresa Piñeiro na rolda de prensa, “na Universidade da
Coruña temos moito talento e moi potente, que non se visibilicen nos
medios as mulleres científicas e tecnólogas pode facer pensar que
non existen e as nenas necesitan referentes”.
Para
a vicerreitora de Igualdade, “a Universidade da Coruña como
servizo público defínese con este directorio de expertas”.
Cristina
López lembrou que o vindeiro 11 de febreiro se celebra o Día
Internacional da Muller e a Nena na Ciencia e desde a Universidade,
con esta e outras accións, pretenden amosar o liderado e a
visibilización das mulleres que traballan na universidade. “Este
directorio é un gran de area para ir eliminando as desigualdades”,
concluíu.
Pola
súa banda, a concelleira de Benestar Social, Participación e
Igualdade da Coruña explicou a participación do Concello nesta
iniciativa que se inclúe dentro dun convenio amplo entre o Concello
e a Universidade da Coruña dotado con 490.000 euros, dos que 25.000
están destinados a varias accións do CEXEF, entre as que está o
Directorio de Expertas e ademais outras iniciativas como un proxecto
de bibliodiversidade, varios podcast e dúas xornadas.