As máquinas do futuro, ao detalle nas Xornadas de Automatización Industrial de Vigo
mércores, 3 de outubro do 2012
- O profesor da Universidade de Vigo Ignacio Armesto, principal impulsor destes encontros
A industria das novas tecnoloxías da información
ten unha irmá na industria da automática. As dúas comparten recursos e as dúas
medran por segundos, tanto en capacidade como en rendibilidade ou optimización.
Entre unha e outra, impúlsanse liñas de traballo como a robótica, que tamén
crece de xeito exponencial e que comparte, coas TIC e a automatización, a arela
de facernos os procesos cotiás máis doados e cómodos. En definitiva, hai moitas
novidades das que dar conta nestes eidos, moitos camiños que albiscar e moitas
experiencias que compartir. Dar un escenario idóneo para isto é o gran
obxectivo das Xornadas de Tecnoloxías e
Solucións para a Automatización Industrial (tamén coñecidas como JAI), que se
desenvolven entre o 12 e o 16 de novembro no Centro Social Novacaixagalicia, acubillando
nun punto de encontro común aos máis destacados profesionais do sector.
As xornadas, que veñen da man da Universidade
de Vigo (co profesor Ignacio Armesto como principal impulsor, tanto das
anteriores como desta convocatoria actual, a quinta), oriéntanse a todo tipo de
perfís ligados á automatización. Unha das súas finalidades é tirar abaixo os
atrancos posíbeis de interacción universidade-empresa, cun programa de 30 horas
de conferencias nas que “se abordarán
temas relacionados coa enerxía eólica, a eficiencia enerxética, a xestión de
versións en programas de control industrial ou as máquinas do futuro, sempre
dende a máxima actualidade xa que iso é o que esperta o interese do público”,
indica o profesor José Ignacio Armesto, coordinador das xornadas.
Desta volta, cóntase coa participación de institucións do talle de Siemens,
Omron, Phoenix, Ence ou PSA Peugeot Citroën, que achegarán a realidade
empresarial aos asistentes dun xeito profesional.
As xornadas terán lugar entre o 12 e o 16 de
novembro no Centro Social Novacaixagalicia e pódense seguir de forma presencial
ou virtual, xa sexa en directo ou en diferido a través da plataforma de
Uvigo-tv. Os interesados en participar poderán realizar á matrícula a través de
Bubela seguindo os pasos alí indicados, en
función de se son estudantes da Universidade ou profesionais.