As empresas galegas con 10 ou máis empregados superan a media española no uso das TIC

O estudo O uso das TIC e do Comercio electrónico nas empresas 2011/2012 publicado hoxe polo INE sostén que o 98,8% das empresas galegas de 10 ou máis empregados dispoñen de conexión a Internet, máis dun punto por riba da media estatal situando a Galicia na segunda posición no ranking de Comunidades Autónomas neste indicador. Ademais, a práctica totalidade destas empresas dispoñen de ordenador (99,4%), porcentaxe que supera á do conxunto do Estado (98,7%).
O Observatorio da Sociedade da Información e a Modernización de Galicia (OSIMGA), tras analizar os resultados do informe, salienta que os indicadores básicos para as empresas galegas de 10 e máis empregados superan lixeiramente a media española e destaca a vantaxe deste segmento empresarial no uso da sinatura dixital, dos recursos da Administración electrónica e na calidade da banda larga contratada.

Boa adopción das TIC nas empresas de máis de 10 empregados

O 98,7% das empresas galegas de 10 ou máis empregados con conexión a Internet, acceden mediante algunha solución de banda larga. Un 62,2% contan cunha velocidade de entre 2 Mbps e 10 Mbps, superando a media estatal, que se sitúa no 61,5%. No tramo de velocidade entre 10 Mbps e 30 Mbps, a porcentaxe é do 27,4% máis dun punto por riba da media estatal.
Entre as empresas galegas con conexión a Internet, tamén cabe salientar que máis da metade (56,3%) accede á rede a través de telefonía móbil de banda larga (3G) utilizando smartphone ou PDA, valores semellantes á media estatal (56,5%).
Un 98,4% das empresas galegas deste segmento dispón de correo electrónico, 1,2 puntos por riba da media estatal e un 94,3% dispón de telefonía móbil, medio punto máis que a media estatal. Por tanto, nos principais indicadores básicos relativos ás empresas de 10 e máis empregados, o comportamento da media galega é lixeiramente superior á estatal.
Por outra banda, o 69,4% das empresas deste segmento dispón de páxina web, un 13,4% máis ca no ano 2011. Este indicador experimentou un crecemento superior ao da media estatal, permitindo reducir a fenda dixital de 5,8 puntos no ano 2011 a tan só 1,6 puntos na actualidade.
Especialmente significativo é o incremento no emprego da sinatura dixital entre as empresas galegas de 10 e máis empregados. Un 74,7% das empresas galegas deste segmento con conexión a Internet emprega a sinatura dixital, cun crecemento do 26,2% con respecto a 2011 e superando a media estatal en 4 puntos. Das empresas galegas que fan uso da mesma, o 98,4% emprégana para relacionarse coas AAPP e un 22,5% para relacionarse con provedores e clientes.