As empresarias e emprendedoras da contorna compostelá fórmanse en recursos dixitais para incrementar clientela
martes, 30 de novembro do 2021
Na
mañá deste 30 de novembro celebrouse nas dependencias da Cámara de
Comercio de Santiago unha sesión sobre transformación tecnolóxica
co foco directamente posto nas profesionais, nas autónomas, nas
emprendedoras e nas empresarias. A xornada Como atraer máis
clientes a calquera negocio grazas á dixitalización,
enmarcada no Programa de Apoio Empresarial ás Mulleres (impulsado
pola entidade cameral compostelá en colaboración coa Cámara de
Comercio de España e con financiamento do Fondo Social Europeo e o
Instituto da Muller para a Igualdade de Oportunidades) foi impartida
por Juan Luis Magariños.
A
sesión tivo como obxectivo achandar o camiño da dixitalización
para as persoas participantes, un camiño de urxencia ante as
circunstancias derivadas da pandemia COVID-19 (cuxo impacto foi
especialmente severo nas pequenas empresas, debido aos seus altos
niveis de vulnerabilidade), xa que as ferramentas TIC son un
importante recurso do que botar man para sobrevivir e medrar
empresarialmente. Amais, engadiuse na xornada, “a dixitalización
constitúe un elemento fundamental para o peche das brechas sociais,
territoriais e de xénero”.
Na
cita deste martes, mulleres empresarias e emprendedoras da contorna
compostelá puideron coñecer as novas regras para adaptárense elas
e os seus negocios á contorna tecnolóxica da forma máis eficaz.
Púxose o foco nun dos principais retos deste proceso, que é o de
achegar claridade, coñecemento e autoliderado nun panorama
postpandémico volátil e de gran incerteza. Tamén se fixo fincapé
nos cambios experimentados nos hábitos de consumo e a experiencia do
cliente, un estado de cousas no que se fai máis necesario ca nunca
“aproveitar as vantaxes que xeran as canles dixitais como xa o
están facendo outros negocios”, explicouse na xornada.