As claves para o financiamento de firmas tecnolóxicas, a fondo na USC
xoves, 15 de setembro do 2011
- Exterior do Centro de Estudos Avanzados, emprazado en Vista Alegre, Santiago
Ter un proxecto empresarial innovador e tecnolóxico
está moi ben, pero como facer que se convirta en realidade do xeito máis
directo, seguro e eficaz? Dito doutro xeito: de onde sacar os cartos? Dar a
coñecer diversas canles para cubrir orzamentariamente as nosas ideas
innovadoras é o gran obxectivo dun encontro a celebrar o día 22 no Centro de
Estudos Avanzados de Santiago baixo o seguinte epígrafe: A busca de financiamento das empresas tecnolóxicas. A xornada de
traballo, organizada pola USC coa axuda da Xunta, diríxese a achegar recursos
de valor a emprendedores, persoal técnico de apoio empresarial e profesionais
vinculados ao financiamento privado.
O obxectivo, informa a
USC, é reunir baixo un mesmo teito e cun mesmo cometido a investidores e
expertos en apoio orzamentario que asesoren e axuden aos empresarios novos no
seu camiño cara ao financiamento privado. O encontro tamén abordará “novas formas de crear empresas, atendendo a
criterios socialmente responsables e o liderado feminino a través da
experiencia de mulleres que tiveron un papel indispensable no desenvolvemento
das organizacións que lideran”, cóntanos a Universidade.