As bibliotecas sanitarias galegas permitirán a o acceso aos seus fondos dende calquera lugar
luns, 9 de xullo do 2012
Este luns 9 de xullo deuse a coñecer
unha iniciativa para
favorecer, a través das novas tecnoloxías, meirande colaboración entre as
bibliotecas da Consellería de Sanidade. Esta medida faría posíbel, entre
outras cousas, que se poidan consultar tódolos fondos integrados e consultábeis
dos devanditos centros dende calquera emprazamento no que nos atopemos. Estamos
a falar do que sería o primeiro catálogo colectivo, en liña, das bibliotecas
sanitarias galegas (BICO), tal e como o definiu o secretario xeral técnico da
Consellería de Sanidade, Antonio Fernández-Campa, ante os medios de comunicación.
A medida, engadiu, compleméntase cun
convenio de colaboración coa Fundación Dialnet da Universidade da Rioxa que
permitirá meirande cooperación cos centros de coñecemento estatais. De feito,
na iniciativa, amais da Consellería de Sanidade e Dialnet, interveñen 56
bibliotecas universitarias, 4 bibliotecas públicas e 10 bibliotecas
especializadas, “sendo a Consellería de
Sanidade a primeira entidade autonómica de xestión sanitaria que asina un
convenio coa Fundación”, informouse.
Lembrar que a Fundación Dialnet é
responsábel do portal bibliográfico de acceso a produción científica hispana
(revistas, libros electrónicos científicos e tese doutorais) e que a súa colaboración
co departamento administrativo autonómico materializarase na achega das
publicacións electrónicas editadas pola Consellería de Sanidade, abranguendo a
maiores varias publicacións no eido da saúde, como é a revista Galicia Clínica.
A sinatura deste convenio “repercutirá na
difusión das publicacións da Consellería, así como nos profesionais que a
compoñen, que terán acceso a opcións personalizadas e avanzadas dispoñibles en
Dialnet”, engadiuse.
Volvendo
ao catálogo en liña presentado das bibliotecas galegas da rede BICO, dicir que
grazas a este recurso, informou Fernández-Campa, será posíbel atopar máis de 45.000 documentos, “moitos
deles ofrecendo a posibilidade de consultalos directamente en liña, sexan
libros, publicacións periódicas e todo tipo de materiais multimedia”. O
fondo documental estará a disposición de toda a cidadanía galega, aínda que serán
os profesionais do SERGAS, os que probablemente lle atopen meirande utilidade e
potencial. De feito, a través de cadansúa clave de acceso contarán con vantaxes
extra, como por exemplo solicitar préstamos en liña, acceder aos textos
completos dos libros electrónicos subscritos pola Consellería, consultar as
listas temáticas, ou gardar e comentar os rexistros que considere de interese.
Lembrar
que Bibliosaúde, a biblioteca
virtual do sistema sanitario público de Galicia, permite aos profesionais
acceder de contado á información científica, con tódalas vantaxes que engade a
rede en materia de dispoñibilidade, de espallamento e de ampliación dos fondos.
Así, o pasado ano 2011 descargáronse máis de 460.000 artigos científicos e
solicitáronse máis de 36.000 fóra da Comunidade. “A iniciativa naceu como proxecto para cambiar o sistema tradicional de
bibliotecas presenciais existentes nos centros hospitalarios a outro no que se
estende, de xeito on-line, o acceso á información a todos os centros sanitarios”,
informou este luns a Consellería de Sanidade.