As axudas de 3.760.000 euros da Deputación da Coruña axudarán á dixitalización das pemes
martes, 16 de xuño do 2020
A
Deputación da Coruña distribuirá un total de 3.760.000 euros para
contribuír a reforzar o tecido empresarial da provincia e a paliar o
impacto que a pandemia da COVID-19 está a ter nas empresas e
autónomos. E
farao a través de dúas liñas de axudas: os programas PEL-Pemes e
PEL-Emprende 2020, cuxo prazo de solicitude rematou este 11 de xuño.
A estes apoios para, por unha banda, afrontar con novo equipamento e
ferramentas a desescalada (por exemplo incrementando o seu
proceso de dixitalización) e, pola outra, para ampliar equipo
profesional, aspiran finalmente 1.011 empresas e persoas autónomas
da provincia, que son as que presentaron solicitudes ás dúas
vertentes de PEL.
A
meirande parte das solicitudes dirixíronse á liña de PEL Emprende
para investimentos, con 700 solicitudes presentadas, o que supón o
69,24% do total; seguido da liña de PEL Pemes para a contratación
de novo persoal con 246 (o 24,33%), e 65 (o 6,43%) e de PEL Pemes
Mantemento, que permite manter a axuda a traballadoras/es contratados
no ano anterior.
PEL-Pemes
A
liña PEL-Pemes subvencionará as pequenas empresas e autónomos con
sede nos concellos de menos de 20.000 habitantes da provincia da
Coruña para a contratación laboral dunha persoa en situación de
desemprego durante un período de 12 meses. Como dixemos, a
Deputación financiará o 70% do soldo e a Seguridade Social do/a
traballador/a contratado/a, ata un máximo de 15.400 euros anuais.
PEL-Emprende
Polo
que respecta á liña PEL-Emprende, está destinada a autónomos e
empresas da provincia da Coruña con menos de cinco anos de
antigüidade e sede social en calquera dos concellos da provincia. As
axudas desta sección cubrirán ata o 70% do investimento, cun máximo
de 17.500 euros, para a compra de aplicacións informáticas,
maquinaria, útiles, mobiliario e equipos para procesos de
información. “Todos eles deben ser elementos novos e directamente
relacionados coa actividade da empresa”, explica a Deputación nas
bases.
PEL-Pemes
Mantemento
A
maiores do devandito e relacionada directamente con PEL-Pemes, a
entidade provincial habilitou a liña Mantemento, coa que se
subvenciona o mantemento das contratacións laborais indefinidas da
convocatoria anterior do programa durante un ano máis. Deste xeito,
as empresas poden optar a unha nova axuda para manter o posto de
traballo creado en 2019 durante 12 meses máis. Nestes casos, a
Deputación financiará o 50% do soldo e Seguridade Social do
traballador/a cun importe máximo de 11.000 euros anuais. Estes
contratos son sempre de carácter indefinido.
