As aulas CeMIT impartiron formación a 14.600 galegas e galegos ao longo deste ano
venres, 10 de agosto do 2012
A Rede
de Aulas CeMIT, un tecido de espazos de conexión e dinamización
dixital espallados por toda a nosa terra e dependente de Axencia para
a Modernización Tecnolóxica de Galicia (AMTEGA), presentou este
venres un novo reconto do acadado ao longo deste ano en materia de
aprendizaxe e divulgación achegadas para a cidadanía. En detalle,
participaron nas actividades do seu Plan de Formación 2012 arredor
de 14.600 galegas e galegos, unha cifra que, segundo os responsábeis
da Rede, case duplica o número de asistentes en 2011 e vai camiño
de ir alén da previsión fixada dos 15.000 participantes para finais
de ano.
En total, impartíronse até o pasado
mes de xuño máis de 20.000 horas de formación nos 98 centros que
integran a Rede. “A maioría destas horas, máis de 9.000”,
engaden fontes de AMTEGA, “corresponden a cursos de
alfabetización, mentres que as accións multimedia supuxeron máis
de 2.300 horas de sesións”.
Os cursos e seminarios formativos de
natureza avanzada, para profesionais das novas tecnoloxías con
amplos coñecementos sobre o eido TIC, impartíronse dende un dos
centros principais de actividade da Rede CeMIT, o Centro de Novas
Tecnoloxías de Galicia de Santiago (Conxo), onde se superaron as
2.000 horas. O labor que se despregou na Escola Galega de
Administración Pública (EGAP) para os empregados públicos
materializouse en 1.900 horas de ensino.
Como novidades postas en marcha ao
abeiro do dito plan formativo, sinalar que se impulsou a práctica da
teleformación a través, entre outras cousas, dunha aula virtual na
web da Rede CeMIT que posibilita a aprendizaxe en TIC dende calquera
lugar no que nos atopemos, sempre que teñamos acceso a Internet.
Este espazo en liña ten dispoñíbeis arestora nove cursos sobre
diferentes temas relativos á capacitación dixital.
A Rede CeMIT tamén acolleu nos seis
primeiros meses do ano 70 charlas e máis o mantemento do servizo
Aula Aberta, que permite o acceso libre e de balde dos usuarios ao
emprego do equipamento co apoio e asesoramento dun axente
especializado.