As TIC, máis presentes ca nunca nos proxectos innovadores galardoados pola USC

Acto de entrega dos galardóns da Universidade de Santiago fotografado por Santi Alvite

A resolución da décima convocatoria do Concurso de Proxectos Empresariais Innovadores da USC vén de deixar un sabor de boca especialmente tecnolóxico-dixital. Isto vén a conto pola natureza de tódolos proxectos galardoados, en maior ou menor medida todos eles tirando partido das novas canles e recursos da información. Como por exemplo a iniciativa que foi obxecto do primeiro premio de certame (chamada Biovía, coma a empresa de I+D responsable da mesma), e que consiste na achega de novas ferramentas de biomonitorización para o control dos medios atmosférico, mariño e fluvial. A empresa, que recibiu o premio de mans do reitor da USC, Juan Casares Long, desenvolverá en breve un dos seus primeiros contornos de traballo, a marca de garantía Calidade Aire Limpo, outorgada pola Oficina de Patentes e Marcas. Amais de Biovía, o certame da Universidade de Santiago recoñeceu os valores do proxecto Moonbite, que abrangue a posta en marcha de varias liñas de deseño de videoxogos para consolas e móbiles.
Segundo fai saber a USC, diríxese Moonbite cara a posta en xogo, neste eido concreto do lecer dixital, dun factor de futuro que abre novos espazos de relación entre quen xoga (nós) e quen nolo permite (a máquina). Falamos do factor intelixencia emocional, base para acadar finalmente a empatía entre consola e xogador. Carlos Fernández, graduado en Ciencias Económicas, foi o encargado de recibir o galardón.
Polo que respecta á modalidade de Muller Emprendedora, o recoñecemento máximo foi dar á proposta Galebook, plataforma que, como o seu propio nome indica, encamíñase a favorecer o espallamento do libro galego a través dos novos formatos que pon en xogo o dixital. Máis polo miúdo, trátase dun plataforma tecnolóxica para a distribución e para a promoción de volumes dixitais na nosa lingua, atopándose entre os seus obxectivos o de converterse en colaboradora das editoriais da nosa terra.
A licenciada en Filoloxía Románica María J.Prol recolleu o galardón en nome dos seus colaboradores.
Asemade, tamén se premiou dentro da categoría Medioambiental un servizo innovador de xestión e instalación dun sistema de tratamento de fosas sépticas para a produción de biogás nas aldeas galegas (da man de Edgar Romero Lema, enxeñeiro de Montes); e dentro da modalidade Sensibilidade Social a iniciativa iCarto, un proxecto empresarial de cartografía especializada destinada á análise de infraestruturas territoriais e á xestión de datos xeoespaciais. Os promotores son técnicos saídos do Laboratorio de Enxeñaría Cartográfica da Universidade da Coruña.
O gañador do premio Empresa Xove é o proxecto Compas.et, pola súa proposta de ofrecer ás pequenas e medianas empresas métodos de negocio, aplicacións informáticas e innovación tecnolóxica, só dispoñibles ata este momento para as grandes compañías. Esta iniciativa foi promovida por Óscar Pasaró, licenciado en Física.