As Rozas acolle o 13 a segunda xornada de traballo de Civil UAVs Initiative
venres, 9 de setembro do 2016
A Axencia Galega de
Innovación (GAIN) vai organizar para a semana, o día 13 e na
contorna do aeródromo das Rozas (Castro de Rei, Lugo), a
segunda edición das xornadas de traballo arredor do proxecto Civil
UAVs Initiative. O obxectivo é dar a coñecer as
actuacións que abren novas oportunidades de negocio no crecente
mercado dos sistemas aéreos non tripulados para os nosos axentes da
innovación. Durante este II Workshop presentarase o
estado de execución da fase primeira do proxecto (contrato asinado
cos socios Indra e Inaer) e as fichas de avance das que sairán as
primeiras contratacións da Fase B da Civil UAVs Initiative.
Segundo informa o Centro
Tecnolóxico Gradiant, a Fase B da iniciativa comezou o pasado mes de
setembro co lanzamento dun proceso de consultas preliminares ao
mercado, que segue aberto e ao que se presentaron polo de agora máis
de 100 propostas. Estas servirán de alicerce para elaborar as ditas
fichas de avance, que permitirán que as empresas coñezan de forma
máis precisa as necesidades funcionais da Xunta en relación ás
distintas solucións tecnolóxicas innovadoras baseadas en vehículos
non tripulados.
Gradiant tamén lembra,
“en relación co desenvolvemento da Fase B”, que a Consellería
de Economía e o Ministerio de Economía veñen de asinar un convenio
de colaboración para apoiar a Compra Pública Innovadora (CPI) de
tecnoloxía no ámbito dos vehículos non tripulados. O importe deste
convenio ascende a 24 millóns de euros, dos que 19,2 millóns
proveñen de fondos europeos xestionados polo Ministerio e 4,8
millóns serán achegados pola Xunta.
Civil UAVs Initiative
O proxecto, centrado no
sector emerxente dos avións non tripulados, supón un investimento
de 115 millóns de euros e a creación de 600 empregos. Nesta
iniciativa a Xunta ten como socios industriais as empresas
multinacionais Indra e Inaer. O obxectivo dos impulsores é converter
o parque industrial e tecnolóxico das Rozas (sede de Civil
UAVs Initiative) “nun referente mundial no desenvolvemento e
fabricación de avións non tripulados de ámbito civil”.
O proxecto conxunto
inclúe un plan asociado con contratos para 18 empresas, das cales o
70% son galegas; acordos tamén para 14 centros de coñecemento da
Comunidade (entre os que están as tres universidades, o Centro
Tecnolóxico Gradiant e mailo CESGA); o compromiso das multinacionais
Indra e Inaer de trasladar a Galicia a súa actividade de avións non
tripulados; e a construción do parque tecnolóxico e industrial en
Rozas.
Indra e Inaer trasladarán a súa activade de avións non
tripulados (UAVs polas súas siglas en inglés) a Galicia,
comprometéndose tamén, no marco deste proxecto, á implantación de
6 novas empresas na Comunidade, a desenvolver un catálogo de
produtos que se fabricarán integramente en Galicia e se
comercializarán a nivel mundial, e a impulsar tecnoloxías
transversais de alto impacto noutros sectores como o naval ou a
automoción.