Arrinca en Santiago a cuarta edición do Congreso de Fenda Dixital
xoves, 7 de abril do 2016
A Facultade de Ciencias da Educación de Santiago
(Campus Vida) acolle estes días a cuarta edición do Congreso
de Fenda Dixital, unha xuntanza destinada, como o seu propio
indica, a pór sobre a mesa os porqués da existencia (aínda) de
amplos sectores da poboación que non teñen nin tan sequera acceso
aos máis mínimos recursos dixitais e de información. Máis polo
miúdo e segundo avanza a organización, avaliaranse as posibilidades
que as Tecnoloxías da Información e a Comunicación (TIC) poden
ofrecer para “contribuír ao desenvolvemento de procesos de
inclusión educativa, á abordaxe das necesidades educativas
especiais e a facilitar ou promover a igualdade”. O evento
desenvólvese a partir deste xoves 7 e até o sábado 9.
A xornada inaugural presidiuna ás 9.30 horas o
vicerreitor de Comunicación e Coordinación, Xosé Pereira, este
xoves 7. Interviñeron tamén a decana da Facultade, Carmen Fernández
Morante; o director xeral de Educación, Formación Profesional e
Innovación, Manuel Corredoira; o concelleiro de Educación de
Santiago, Manuel Dios; a presidenta de Nova Escola Galega, Mariló
Cancelo; Daniela Gonzalves en representación das universidades
portuguesas participantes; e Montse Castro, en nome do comité
organizador. A conferencia que abriu a quenda de intervencións
estivo adicada aos desafíos da inclusión na sociedade dixital e
impartiraa Ángeles Parrilla, da Universidade de Vigo, e Tiberio
Feliz da UNED.
A xornada da tarde, a partir das 16.30 horas
continuará cun relatorio sobre recursos educacionais abertos e a
democratización do coñecemento e unha mesa redonda que avaliará a
contribución das TIC en iniciativas de atención á diversidade.
Este primeiro día do congreso concluirá coa proxección das pezas
que integran o proxecto Vida de Rubén Riós, unha
curtametraxe –Vida- e un documental –Máis ca Vida-
de marcado carácter social protagonizados por persoas con
discapacidade funcional que entrelazan nun guión os medos e
prexuízos que aparecen no día a día destas persoas.
Coa participación de actores de éxito como Javier
Gutiérrez, Cristina Castaño, Mariana Carballal, María Mera ou
Estíbaliz Veiga, Vida e Máis ca Vida buscan amosar as
arelas dos/das protagonistas por “rachar as barreiras cunha
mentalidade positiva”.
O congreso organízano nesta edición as facultades
de Ciencias da Educación das tres universidades galegas, xunto coa
Universidade de Tras-os-Montes e Alto Douro, o Centro de Estudos
Eurorrexionais Galicia-Norte de Portugal e outras institucións
investigadoras e profesionais arredor da docencia e a pedagoxía
tanto galegas como brasileiras. A organización pretende crear “un
espazo de encontro internacional a través do que xerar debate sobre
o estado actual das TIC nos diferentes contextos educativos”,
informou. Amais disto, o Congreso de Fenda Dixital constitúe en
palabras dos organizadores “un contexto de intercambio sobre
experiencias e proxectos de investigación innovadores, favorece o
feedback e a reflexión entre docentes, educadores/as sociais,
profesionais da pedagoxía ou da psicoloxía e asistentes sociais coa
finalidade de analizar criticamente o papel que as TIC desempeñan no
ámbito académico e nos contextos sociocomunitarios”.