Arredor dun cento de enxeñeiros celebraron coas súas familias San Teleco XL
luns, 26 de outubro do 2015
Este sábado 24 de outubro máis dun cento de ex
alumnas/os (telecos) da Escola de Enxeñaría de
Telecomunicación de Vigo participaron xunto coas súas familias en
San Teleco XL, un encontro de confraternización organizado
conxuntamente entre a dirección da propia Escola e o Colexio Oficial
de Enxeñaría en Telecomunicación de Galicia, o
COETG. O evento de irmandade foi conducido por Íñigo Cuíñas,
director da Escola da Universidade de Vigo e nel participaron varios
membros da directiva do COETG/AETG e un bo número de colexiadas/os e
asociadas/os.
Segundo informa a organización do evento, o acto
central levouse a cabo no salón de actos do devandito centro
universitario e nel participaron profesionais que no seu momento
exerceron como delegados de alumnos. A xornada incluíu tamén un
percorrido polas aulas e laboratorios para dar a coñecer “o cambio
tan importante que deu a Escola ao longo destes anos”.
De xeito complementario a estas actividades de
confraternización, arredor de medio cento de rapazas e rapaces,
tanto de Infantil como de Educación Primaria e Secundaria,
participaron arreo nunha serie de obradoiros destinados ás distintas
franxas idades e co obxectivo de achegar lecer tecnolóxico e xanelas
directas á experimentación coa electrónica, a intelixencia
artificial, a robótica e a música dixital. Esta axenda de
actividades rematou cun xantar no que concorreron todos os asistentes
á festa teleco.
Sinalar tamén que coa xornada de confraternidade
celebrouse o 30 aniversario da Escola e as vodas de prata da
graduación da primeira promoción de enxeñeiros e enxeñeiras que
saíron das súas aulas. Segundo apuntou previamente ao
desenvolvemento da festa Íñigo Cuíñas, “familiarizar as novas
xeracións coas tecnoloxías é o primeiro paso para crear nos nenos
o interese pola ciencia e a técnica e atraelos cara as actividades
dos enxeñeiros”, dixo, engadindo logo que “San Teleco representa
un bo momento para favorecer a relación persoal entre os diferentes
actores do tecido empresarial TIC galego”.