Apple rexistra os mellores resultados económicos da súa historia
martes, 24 de xaneiro do 2012
- Tim Cook recoñece que o iPad está a erosionar as vendas de ordenadores persoais
O beneficio neto de Apple no último trimestre de 2011 superou
as expectativas, chegando aos 13.060 millóns de dólares, o que sería o
mellor trimestre fiscal da historia da compañía, con máis de 37 millóns de
iPhones vendidos (un 128% máis que o mesmo período do ano anterior), 15,4 millóns de iPads e 5,2 millóns de Macs, o
que supón un crecemento nas principais liñas de produto da compañía (rexistrándose
unha caída do 21% na venda de iPods), aínda que Tim Cook, sucesor de Steve
Jobs, recoñeceu
a existencia de certa canibalización dos seus ordenadores por parte do iPad,
aínda que matizando que “hai unha maior
canibalización de ordenadores con Windows polo iPad”.
Os resultados
da compañía de Cupertino son realmente impresionantes, deixando na caixa da
empresa 97.000 millóns de dólares en efectivo, constatando a fortaleza de
negocios como a venda de aplicacións (que saltou dos dispositivos móbiles aos
ordenadores nos últimos meses) e os contidos descargables (iTunes ingresou 1.700
millóns de dólares), as tendas oficiais de Apple gozan de boa saúde (melloraron
os seus resultados un 43%) e incluso un produto cunha visibilidade tan reducida
coma o Apple TV está a ter boas vendas (chegando aos 104 millóns de unidades,
polo que non sería de sorprender que o vindeiro mercado no que Apple queira ter
presenza sexa o dos televisores).