Andrés do Barro, nova incorporación ao Álbum de Galicia
mércores, 9 de xuño do 2021
O
Álbum de Galicia, a base de datos online do Consello da
Cultura Galega na que se recolle a historia da nosa terra a través
de biografías destacadas, vén este mes de xuño con novas
incorporacións. Entre
elas atópase a dun dos grandes representantes da música galega de
todos os tempos: Andrés do Barro.
A
entrada no Álbum comeza deste xeito: “Andrés do Barro é un dos
grandes mitos da música galega”. A súa biografía foi escrita por
Fernando Fernández Rego.
O
gran legado do músico foi, en palabras do seu biógrafo, “un pop
melancólico e atemporal con tinguiduras folk e unha importante dose
de saudade”. Hoxe, segundo destaca o CCG, é reivindicado como unha
referencia ineludíbel da música galega, enxalzándose tamén a súa
modernidade e o seu labor pioneiro na fusión da música popular co
pop.
Álbum
de Galicia
En
xaneiro de 2020 o CCG presentou o Álbum de Galicia, unha colección
dixital de biografías de persoas que destacaron en diversos ámbitos:
desde a sociedade, a ciencia, a cultura ou a empresa. A idea foi “dar
visibilidade e perspectiva de conxunto ás numerosas mulleres e
homes, xa finados, que contribuíron de maneira significativa á
sociedade galega ao longo da súa Historia. En moitos casos, seguen a
ser grandes descoñecidos para o público de todas as idades, de
dentro e de fóra do país”, en palabras do CCG.
As
biografías do Álbum de Galicia están enriquecidas con material
documental, referencias bibliográficas e contidos multimedia que
permiten coñecer a obra das persoas divulgadas, pero tamén a
produción intelectual existente sobre elas.
Ademais,
permite explorar a presenza das persoas biografadas nos fondos
documentais dixitalizados do Consello da Cultura Galega.
O
Álbum de Galicia é o resultado da unificación das coleccións
biográficas temáticas do CCG, que desde o ano 2005 teñen publicado
álbums ao redor da muller, a ciencia ou a emigración, entre outros.