Amosan en Vigo como podemos ampliar mercado no exterior empregando ferramentas TIC
xoves, 8 de xuño do 2017
O
Consorcio
da Zona Franca de Vigo organizou onte un seminario centrado en
mostrar ás PEME como poden lograr vendas internacionais a través de
ferramentas dixitais, como por exemplo as plataformas de comercio
electrónico e os mercados en liña (os chamados market places).
No evento participaron expertos do tecido empresarial TIC galego, por
exemplo de Boardfy (amosando como sacarlle punta ás posibilidades do
comercio electrónico no ámbito internacional) e de The Fun Plan e
Bluscus (fornecendo un percorrido polas súas experiencias de éxito
na exportación a través de market places e ferramentas de
venda dixital).
Tamén
interveu na xornada o profesor Emilio G. Roselló, da Universidade de
Vigo, quen falou sobre a importancia da mercadotecnia 4.0 na contorna
actual de mercados externos, mentres que Begoña Albizu introduciu as
principais ferramentas para facer seguimento das licitacións
internacionais que se publican en diversas partes do mundo.
Como
complemento ao seminario, o Consorcio puxo a disposición dos
asistentes o Mapa de tecnoloxías para a internacionalización,
unha guía-roteiro que recolle os principais mecanismos tecnolóxicos
que as PEME poden empregar para detectar información relevante para
o seu acceso a mercados exteriores e procesala de maneira que sexa
útil aos obxectivos estratéxicos definidos antes, durante e despois
do seu chimpo ao mercado internacional.
Este
evento é o terceiro dun ciclo de catro seminarios divulgativos
acerca do potencial das novas tecnoloxías no proceso de
internacionalización das PEME que o Consorcio está a promover
durante os meses de maio e xuño. Cada evento céntrase nunha do
catro grandes fases dun proceso de internacionalización: o primeiro
na identificación de mercados (celebrado en maio), o segundo na
promoción internacional (en maio), o terceiro sobre vendas
internacionais e o cuarto (o 29 de xuño) sobre xestión de
operacións internacionais.
En
cada seminario, sinala a Consorcio, recoñecidos expertos do tecido
empresarial TIC de Galicia presentan de forma práctica as
tecnoloxías de apoio existentes para a fase do proceso de
internacionalización abordada. “Cada evento”, engade a
organización dos mesmos, “conta asemade coa participación de
empresas galegas que comparten cos asistentes a súa experiencia no
uso destas tecnoloxías durante os seus respectivos procesos de
procura de novos mercados”.
O
cuarto e último seminario, que abordará a fase de xestión
internacional, celebrarase na sede da Confederación de Empresarios
de Pontevedra o vindeiro xoves 29 de xuño. As inscricións ao mesmo
están abertas e poden tramitarse a
través da web demolabs.czfv.es.