Amigos de Galicia e o Concello de Marín achegan un curso para loitar contra a fenda dixital dos maiores

A Fundación Amigos de Galicia, en colaboración co Concello de Marín, vai desenvolver este inverno unha actividade formativa para impulsar a capacitación dixital das persoas maiores. O curso está dirixido a veciños e veciñas de Marín de máis de 65 anos que teñan un nivel de iniciación ao ámbito da informática. As clases desenvolveranse na Aula CeMIT da Biblioteca Pública Vidal Pazos os venres 9, 16 e 23 de febreiro e o 1 de marzo, en horario de 10.00 a 12.30 horas e non precisan traer ningún tipo de material.
A formación porá o foco en familiarizar aos asistentes na realización de trámites en liña, no uso das máquinas de quendas das administracións e dos centros de saúde, no emprego do caixeiro automático das entidades bancarias ou en como tirarlle proveito ao teléfono móbil para o seu día a día. Tamén se familiarizará ao alumnado no funcionamento da aplicación móbil do SERGAS.
As persoas interesadas poderán inscribirse no curso a través do mail alcaldia@concellodemarin.es e haberá un máximo de 15 prazas. O día máximo para inscribirse será o mércores día 7.