Ames impulsará con fondos europeos a eAdministración e o uso das TIC
mércores, 24 de maio do 2017
Os
proxectos smart do Concello de Ames (Impulsa Ames) veñen de
recibir un importante apoio europeo. Máis
en detalle, o municipio coruñés foi seleccionado na segunda
convocatoria de fondos DUSI cunha axuda de 5 millóns de euros,
incrementábel até os 6.250.000 euros cos fondos propios do
Concello. O plan Impulsa Ames abrangue 5 liñas de actuación nos
ámbitos social, climático e enerxético, ambiental, demográfico e
económico. “En primeiro lugar”, informou estes días o Goberno
local, “tratarase de aproveitar o potencial das novas tecnoloxías
de comunicación para reducir os desequilibrios existentes entre o
ámbito urbano e o rural no acceso aos servizos municipais”.
Para
isto, faranse esforzos para optimizar o uso das TIC e aproveitarase o
seu potencial para pór en valor os recursos naturais e culturais do
concello, amais dunha xestión enerxética e de mobilidade máis
eficiente.
Amais
de impulsar a dispoñibilidade das redes e o seu uso entre a
cidadanía, forneceranse (en materia de transportes sustentábeis e
calidade de vida) sendas peonís e espazos verdes.
No
ámbito TIC, a parte de fomentar o uso das novas ferramentas entre a
veciñanza, faranse esforzos para implantar e fortalecer a
Administración Electrónica a través de novas ferramentas ao abeiro
dos servizos municipais. Para este punto, destinaranse 490.000 euros
de fondos europeos. Outra das accións “de meirande calado”, cun
orzamento que se sitúa a rentes do millón de euros, será a posta
en marcha dun transporte público que permita a conectividade no
propio concello favorecendo a mobilidade e a redución de emisións
de CO2.