Amazon impulsará a transformación cloud do BBVA
venres, 21 de outubro do 2016
BBVA
vén de anunciar un acordo con Amazon Web Services (AWS) co
obxectivo de impulsar a transformación do grupo bancario a través
dos servizos da nube (cloud) que ofrece a multinacional TIC. O
acordo, inserido na recente política de alianzas do BBVA con
“provedores estratéxicos” referentes, situará á compañía AWS
como primeira provedora de de servizos de computación na nube. A
través deste pacto, o grupo bancario fará a migración de
compoñentes á plataforma cloud que Amazon pon á súa
disposición: unha plataforma que xa comezou a coller forma, froito
da colaboración mutua, e que será, nas súas palabras, “unha
solución na nube segura, flexíbel e con marxe de adaptación e
evolución”. Con isto, a entidade fará fronte a un desafío ben
concreto: o medre exponencial de operacións inherente á súa
transformación dixital.
Segundo
lembrou o BBVA para facernos unha idea do seu crecemento ao abeiro do
tecnolóxico, a día de hoxe as súas plataformas xestionan máis de
542 millóns de operacións diarias, fronte aos 90 millóns en 2006.
“En 2017”, explica, o grupo, “estarán preparadas para realizar
1.000 millóns de operacións diarias en tempo real, o que confirma a
rápida adaptación de BBVA aos cambios nas necesidades e
expectativas dos seus clientes”.
Lembrar
que o Grupo BBVA xa utiliza AWS para a súa aplicación para
comercios Commerce 360, que ofrece intelixencia comercial a
través de TPV (Terminal Punto de Venda), actualmente dispoñíbel en
España, e prevé seguir estendendo o uso dos servizos na nube de
AWS.
Nun
plano máis detallado, o acordo posibilitará un maior uso do
ecosistema da nube de AWS por parte do grupo bancario e a creación
dunha comunidade de coñecemento na nube que compartirá información
sobre esta tecnoloxía e velará polo rigor nas políticas de
arquitectura, estándares e seguridade. Ademais, AWS traballará coas
recomendacións de BBVA para adaptar a súa liña de servizos ao
sector financeiro.