Alumnado do Grao en Intelixencia Artificial visita a sede do CITIC

Durante a mañá deste mércores 13 de marzo un grupo de alumnas e alumnos do Grao en Intelixencia Artificial da Universidade da Coruña visitou a sede do CITIC. O grupo comezou a súa experiencia no Demostrador Tecnolóxico xunto a Adriana Dapena Janeiro, investigadora do CITIC, Catedrática de universidade e docente do Grao en IA. Na sala puideron probar as lentes de Realidade Aumentada e Realidade Virtual, así como o robot NAO, un humanoide programábel que conta con recoñecemento facial e de voz.
Tralas probas no Demostrador, a visita continuou no laboratorio de Realidade Virtual, onde coñeceron o sistema OptiTrack. Este sistema captura e rexistra os movementos dunha persoa ou obxecto nos eixos X, Y e Z mediante o seguimento de marcadores. O centro conta con oito cámaras calibradas de captura de movemento.
Despois, os voluntarios probaron o supermercado virtual desenvolvido polo investigador Manuel Lagos co obxectivo de axudar na rehabilitación de persoas con discapacidade.