Altia renova a súa solución Mercurio para facer aínda máis áxiles e doados os procesos de licitación electrónica
venres, 16 de maio do 2014
A empresa
tecnolóxico-dixital Altia,
radicada na Coruña e
con instalacións acabadas de estrear en Vigo, vén de anunciar
un importante proceso de renovación da súa filosofía de traballo,
agora máis que nunca centrada en achegar innovación a tempo
completo e solucións tecnolóxicas de valor engadido. Nesta liña é
onde se insire precisamente a reformulación de Mercurio, unha
plataforma ideada e desenvolvida pola compañía galega para
facilitar aos seus clientes a xestión integral (de xeito telemático)
de todos os procesos relacionados coa licitación.
E até onde chegou este
proceso de reformulación? Pois virtualmente até o máis alto (moi
por enriba da nosa contorna), posto que segundo informa Altia unha
das medidas a topar con respecto a Mercurio foi intensificar a súa
comercialización en modo nube e co obxecto de favorecer a súa
dispoñibilidade e fomentar o seu uso.
En palabras do presidente
da compañía, Constantino Fernández, “do que se trata é de
favorecer a licitación electrónica”, e calquera mellora de
procesos que acade iso, engade, terá por forza “un impacto
significativo na economía española”. Fernández lembra que a día
de hoxe, “a contratación pública en España representa
aproximadamente o 15% do PIB nacional”, e recorda tamén que unha
directiva europea aprobada recentemente establece o prazo de xaneiro
de 2018 para que todas as licitacións se faga de maneira
electrónica. Tendo en conta isto, a conveniencia dunha ferramenta
como Mercurio é aínda maior, explica, e máis se temos en conta que
“esta solución favorece o cumprimento das diferentes leis (ou
borradores das mesmas) de transparencia que se han ir aprobando no
Estado por parte do Goberno Central e de diversos gobernos
autonómicos”.
Por outra banda, o
presidente de Altia tamén salienta a longa experiencia acumulada por
Mercurio e polos profesionais que lle dan forma e que acaban de
mellorar substancialmente o seu software: dez anos de experiencia no
mercado e presenza en boa parte das principais empresas do ámbito
estatal. De feito, Altia informa que se trata “da plataforma máis
usada en España para realizar procedementos de licitación
electrónicos ligados ao sector público”.
Respecto ás partes que
integra Mercurio, sinalar que acubilla tres módulos diferentes: o
referido ao rexistro de contratistas, o de licitación electrónica
propiamente e o vencellado á notificación electrónica e
comunicacións.
O rexistro de
contratistas é o módulo que facilita o rexistro e a homologación
de firmas licitadoras como provedoras das administracións públicas
e que permite a presentación de documentos acreditativos destas
empresas de forma telemática. Posibilita que as empresas non teñan
que entregar reiteradamente aquela documentación que a
administración adoita esixir con carácter xeral e uniforme na
normativa contractual. “É por iso”, explican fontes de Altia,
“que este módulo está aliñado coa Lei 14/2013 de Apoio a
Emprendedores e á súa Internacionalización”.
Polo que respecta ao
módulo de licitación electrónica, dicir que permite o tratamento
integral, de modo dixital, do ciclo completo de licitación tanto
para empresas como para UTE (publicación de pregos, sinatura
electrónica do contrato, rexistro de licitadores, presentacións das
propostas asinadas vía electrónica por parte dos licitadores,
realización de aperturas electrónicas das mesmas, etc). Este módulo
soporta todos os procedementos de contratación, incluíndo a Poxa
Electrónica; tal e como se esixe na Lei de Contratos do Sector
Público.
A maiores, Mercurio
ofrece a posibilidade de que as propostas poidan ser presentadas
mediante a vía tradicional en papel e tamén de maneira dixital.
Posibilita que o organismo poida dar de alta as propostas que cheguen
pola primeira vía e mesmo subir arquivos electrónicos que se
entreguen adxuntos a dicha propostas.
Por último, o módulo de
notificación electrónica e comunicacións posibilita que se poida
prescindir do papel durante todo o proceso de contratación e
facilita a notificación oficial de forma segura, cumprindo coa
legalidade vixente. Segundo informa Altia, “dispón dunha caixa de
correos segura na que os usuarios poden consultar as súas
notificacións, asinar acuse de recibo ou obter copias”. Este
módulo pode usarse, ademais, para calquera tipo de procedemento (non
só para licitación).