Alfredo Ramos renova o seu cargo de presidente do padroado de Gradiant
venres, 2 de decembro do 2022
As
entidades
que integran o padroado do Centro Tecnolóxico Gradiant volveron
elixir a Alfredo Ramos presidente do padroado da Fundación. O
actual presidente do padroado volve conseguir a maioría de votos, do
mesmo xeito que o vicepresidente, José Luis Albo, director de Sector
Público Galicia, Asturias e Cantabria en Indra, así como,
presidente do consello empresarial da Fundación.
Segundo
informaron fontes do centro tecnolóxico vigués facendo balance
destes catro anos no cargo de Ramos, ao longo deste tempo potenciouse
a orientación de Gradiant cara ao sector empresarial e cara á
mellora da competitividade da industria galega mediante as liñas de
conectividade, intelixencia e seguridade. “Mostra diso son os
diversos programas relacionados coa industria intelixente ou a
seguridade industrial, amais das importantes alianzas con
institucións do sector público autonómico e estatal”, engadiron
dende Gradiant.
O
centro tamén destaca que a reelección de Alfredo Ramos e José Luis
Albo achega “estabilidade” ao proxecto actual de manter a
Gradiant como centro TIC de referencia dentro do ecosistema de
innovación en España e consolida o seu posicionamento a nivel
internacional.
Gradiant
é un centro tecnolóxico orientado a dar servizo ás empresas,
contribúe á mellora da competitividade do tecido industrial galego
a través do I+D e a innovación no ámbito TIC (Tecnoloxías da
Información e a Comunicación). Nos seus catorce anos de vida,
desenvolveu e implantou no mercado máis de 350 proxectos e logrou
localizar en Galicia unha base de emprego cualificado integrada por
máis de 150 persoas especializadas en enxeñería, investigación e
expertas en desenvolver innovación no eido das telecomunicacións.