Airapro estrea tenda en liña que serve de escaparate para as Catareiras de Ardebullo e a Sala The Star
mércores, 26 de outubro do 2011
A produtora
carralesa Airapro vén de estrear unha tenda
en liña na que pon a disposición de calquera internauta un feixe de
produtos dos seus artistas e espectáculos: discos, camisetas, chapas, carteis,
entradas...
A marca de
Ardebullo, a aldea ficticia da que proceden as famosas cantareiras Nucha e
Mucha, tamén ten unha forte presenza neste novo espazo, de xeito que os fans
das Cantareiras de Ardebullo poden mercar chapas, camisetas, tazas ou posters coas fotos e logos destas dúas
personaxes, interpretadas cada venres no programa Luar polos actores Marcos
Pereiro e Xosé A. Touriñán, dous dos socios fundadores de Airapro.
No apartado dos discos, o produto estrela é Admirando
a Condición, o primeiro disco de Sés, producido
enteiramente por Airapro e publicado o pasado mes de xullo. Unha proposta de
rock, blues e ritmos latinos 100% en galego e liderada pola compositora
coruñesa MarÃa Xosé Silvar. Nun prisma musical diferente tamén pódese adquirir
o disco
de música contemporánea Doubles,
do clarinetista lalinense Xocas Meijide, outro dos artistas representados por
Airapro. Un catálogo de discos breve (pero selecto) que se irá ampliando nas
próximas semanas.
A tenda
electrónica de Airapro tamén ofrece
a posibilidade de mercar entradas anticipadas para todos os concertos e
monólogos programados na Sala
The Star, o local de espectáculos situado en Carral e rexentado tamén por
Pereiro e Touriñán.