Ahorro.net irrompe na App Store e celébrao cun sorteo de 300 euros para produtos Apple
mércores, 13 de maio do 2015
Os responsábeis de
Ahorro.net, plataforma para a
xestión de finanzas persoais, veñen de informar da saída da
aplicación do ámbito beta, iniciándose así unha nova andaina como
ferramenta de balde na App
Store, onde “conseguiu entrar con forza”, sinalan, ao tempo
que recordan que estamos ante un recurso moi acaido para aqueles
internautas que queiran saber durante todo o día “o que acontece
co seu diñeiro”. De feito, permite cousas como controlar
movementos e engadir e editar bancos. “O usuario”, explican,
“pode dispor de todas as contas e controlar os gastos e os ingresos
de cada unha delas”. Ahorro.net estaba dispoñíbel até
o de agora na versión para Android.
A maiores do devandito, a
plataforma posibilita os usuarios estaren ao día dos recibos que
teñan pendentes de pago, dos que aínda falten por chegar ese mes e
dos cobros de maneira automática, “sen ter que buscar eles a
información, o que axiliza as xestións e reduce o tempo que se
perde localizando cada concepto”.
Os desenvolvedores da
aplicación tamén salientan a capacidade da mesma para fornecer
trucos de aforro específico baseándose nos pagos dos usuarios, “de
xeito que poidan acadar máis beneficios”. Tamén destacan que
tanto na aplicación como dende a web cada movemento é engadido polo
banco en cuestión “de maneira segura” e clasifícanse de modo
automático para visualizar de contado o estado de cada conta.
Con motivo da
actualización de Ahorro.net en iOS, a empresa puxo en marcha un
sorteo co que agasalla dous cartóns de 150 euros para produtos de
Apple a todos aqueles que participen até o vindeiro venres día 15.
Só será preciso que rexistremos a nosa conta de correo na páxina
do sorteo e compartir o concurso en Facebook e Twitter.