Actualizan o Kindle 2 incrementando a súa autonomía e incluíndo soporte de PDF

Os usuarios do lector de libros electrónicos Kindle 2 de Amazon recibiron nas últimas horas unha actualización do seu firmware de xeito que incorpora o rendemento da súa batería un 85% e a lectura nativa de ficheiros en formato PDF, novidades que agradecerán todos os usuarios, aínda que no caso dos documentos en PDF aínda queda moito por mellorar, pois o lector aínda non permite o uso de zoom, de xeito que a meirande parte dos ficheiros en tal formato resulta ilexibles por ter a pantalla do trebello unha resolución moi reducida.
A carga de documentos PDF no Kindle pode facerse a través de USB ou remitindo os ficheiros por correo electrónico ao enderezo de e-mail asignado ao Kindle (baixo o dominio kindle.com).
A actualización do Kindle debería realizarse de xeito automático para calquera usuario do Kindle 2, aínda que en caso de erro tamén pode instalarse manualmente, e cómpre destacar que os usuarios do Kindle orixinal deberán agardar a que apareza unha actualización semellante para os mesmos (que dende Amazon xa confirman que engadirá soporte de lectura de documentos en PDF).