Abre as súas portas a nosa gran referente en tecnoloxías colaborativas: a Maker Faire Galicia
venres, 23 de novembro do 2018
Finalmente
abriu as súas portas en Santiago, na Cidade da Cultura, a cuarta
edición da feira Maker
Faire Galicia, con toda probabilidade un dos máis salientábeis
acontecementos argalleiros do ámbito estatal. A
apertura do evento contou coa presenza da concelleira de Igualdade,
Promoción Económica e Turismo, Marta Lois, quen mostrou o seu
orgullo polo carácter compostelán e galego dunha feira de tal
envergadura e prestixio. Asemade, Lois engadiu que a Maker Faire
Galicia, que se celebra hoxe, mañá e pasadomañá, é un referente europeo no
ámbito das xuntanzas innovadoras e colaborativas.
A
concelleira tamén recordou que o programa inclúe charlas,
obradoiros, demostracións de parkour, carreiras de coches
DIY, probas con drons nun circuíto especificamente habilitado para a
ocasión (no túnel subterráneo da Cidade da Cultura) e unha
actividade chamada Hebocon que consiste nun campionato de enxeños
robóticos para as familias.
Segundo
fixo saber Lois os días pasados, “coma todos os anos, as charlas
serán un dos pratos fortes do evento”. Amais, haberá conferencias
independentes dentro do programa oficial do evento, como as
coordinadas polo NOS Day, ou o grupo de mulleres tecnolóxicas
Galstech, coas que se fomenta a colaboración entre as diferentes
comunidades tecnólogas de Galicia.
Para
esta cuarta edición, a Maker Faire Galicia volve contar co
patrocinio da Fundación Cidade da Cultura de Galicia, que acolle
tamén o evento no Gaiás, e do Concello de Santiago, a través do
programa Compostela Móvese. Tamén colabora co evento a Fundación
Española para a Ciencia e a Tecnoloxía – Ministerio de Ciencia,
Innovación e Universidades.
Nun
plano máis concreto, con nomes propios e relatorios definidos, as
charlas e mesas de debate contarán coa presenza de persoeiros do
ámbito Maker como Gael Langevin, creador do primeiro robot
humanoide de código aberto; Stiven Kerestegian, xefe de Innovación
e Estratexia do CIID (Copenhagen Institute of Interaction Design), ou
Zoe Powell, deseñadora téxtil especializada na creación de
bioplásticos e membro de Materiom, que formará parte dunha mesa de
debate sobre “a importancia da tecnoloxía para redeseñar o
mundo”, na que tamén participará Gianluca Pugliese, da empresa
Wasp, responsábel da creación dunha impresora 3D con capacidade
para imprimir casas por menos de 1.000 euros.
No
eido científico, Carmen Álvarez, licenciada e doutora en Farmacia
pola Universidade de Santiago de Compostela, falará sobre os avances
da bioimpresión nunha charla na que estará acompañada por
responsables de REGEMAT, empresa española especializada na impresión
3D de tecidos biolóxicos.
Ademais,
para a xornada profesional, a organización seleccionou os 10
proxectos máis innovadores desenvolvidos polos nosos makers,
que presentarán cadanseus enxeños perante un xurado profesional que
elixirá os tres mellores. O acto rematará coa entrega de premios e
unha comida networking para participantes e asistentes a cargo
de O Fogar do Santiso.