Aberto o prazo de inscrición para participar nas xornadas LAV 011
mércores, 1 de decembro do 2010
Por cuarto ano
consecutivo, a Asociación cultural senunpeso
producións, do Concello de Vedra, vai levar a cabo as súas Xornadas de Formación e
Mostra Audiovisual LAV 011, nas que afondará na creación e mostra de pezas
audiovisuais feitas por e para as persoas do lugar que gustan do audiovisual “feito na casa”.
As xornadas, que se
desenvolverán durante os días 12, 13, 18, 19 e 20 de febreiro, son “unha proposta diferente” que durante
tres edicións xa espertaron a curiosidade de máis de 300 alumnos e alumnas e
máis de 20 profesionais que impartiron clases da materia.
Esta cuarta edición do LAV plantéxase, segundo informan dende a organización,
“como a consolidación do traballo levado
a cabo nas anteriores edicións, mais tamén como unha aposta por afondar no
carácter formativo das xornadas e potenciar a súa condición de escaparate de
traballos audioviduais producidos en Galicia”.
As xornadas, para as que xa está
aberto o prazo de inscrición, constarán de catro liñas de actividade ben
diferenciadas porén que se complementan entre si, e que van dende mostras de
curtametraxes ata obradoiros de formación audiovisual, pasando por relatorios nos
que se pretende cubrir distintos aspectos da produción audiovisual da man de
profesionais do sector.
Asemade, para non mesturar á xente
que xa ten experiencia coa que se achega por primeira vez a este mundo, as
xornadas distinguirán entre Iniciación
e Avanzados. Este último nivel,
segundo afirman, “para os que están a cabalo do profesional e o que son
afeccionados cun elevado grao de coñecemento”.