Aberta ata o día 18 a inscrición final da Olimpíada Informática Galega, OIG 2024
martes, 9 de xaneiro do 2024
O
Colexio Profesional de Enxeñaría en Informática de Galicia
(CPEIG), en colaboración coas tres universidades galegas
(Universidade de Vigo, Universidade da Coruña e Universidade de
Santiago) (USC) e o Centro de Investigación en Tecnoloxías da
Información e as Comunicacións (CITIC) da UDC, organizará
a Olimpíada Informática Galega 2024 (OIG 2024) o vindeiro 3 de
febreiro.
O
obxecto da OIG, destinada a estudantes
de secundaria (ESO), bacharelato e ciclos formativos de grao medio, é
“a promoción do coñecemento e das vocacións nesta disciplina da
informática tan presente en todos os ámbitos hoxe en día e
necesaria para a formación integral da mocidade”, segundo explicou
o CPEIG, engadindo que está previsto que o evento se celebre de
xeito presencial na mañá do sábado, 3 de febreiro, na Escola
Superior de Enxeñaría Informática de Ourense (Edificio Politécnico
s/n. Campus de Ourense) de 10:00 a 14:30 horas, coa colaboración da
Facultade de Informática da Coruña da UDC e da Escola Técnica
Superior de Enxeñaría da USC. A organización da OIG pechou a
preinscrición do certame con 20 participantes, e abre hoxe e ata o
18 de xaneiro a inscrición final para a que aínda quedan 16 prazas
dispoñíbeis.
A
competición consistirá na resolución de seis problemas nun prazo
de tres horas. Cada problema deberá resolverse empregando unha
linguaxe de programación que permita automatizar a súa resolución.
Na OIG permítese o uso de C++, Python ou Java. Os problemas da
olimpíada, segundo adianta o CPEIG, adoitan centrarse no deseño
correcto e eficiente de algoritmos. O colexio tamén engade que a OIG
permitirá seleccionar a dous representantes galegos para participar
na XXVIII Olimpíada Informática Española (OIE), que se celebrará
do 15 ao 17 de marzo de 2024 na Escola Técnica Superior de Enxeñaría
Informática da Universidade de Sevilla. De aí, os gañadores
poderán acceder á Olimpíada Informática Internacional, que se
celebrará setembro de 2024 en Exipto.
A
olimpíada deste ano está patrocinada por diversas entidades e
empresas do sector TIC: Abanca, Atos, Bahía Software, Clúster TIC
Galicia, Councilbox, Duacode, DXC Technology, Emetel, Extreme
Networks, Google Clouds, Minsait, NTT Data e Sixtema. Grazas a estas
entidades patrocinadoras, haberá premios adicionais para os
seguintes postos na clasificación, ademais de para a mellor
programadora feminina e para a/o mellor participante da ESO.