Abanca lanza aplicación para aprazarmos dende o móbil o pago das nosas compras con tarxeta
mércores, 16 de novembro do 2016
Abanca segue a centrar boa parte dos seus esforzos
de comunicación e operatividade co cliente nos dispositivos. Sen
ir máis lonxe, a entidade galega lanzou este mércores 16 o seu
servizo Applázame, que nos permite xestionar dende a nosa
banca
móbil o aprazamento de cada unha das compras realizadas con
cartón de crédito Visa ou MasterCard. E todo isto, sinala Abanca,
ca facilidade de coa sinxeleza de podermos facelo cun “só clic”
dende o noso trebello. Segundo engade a entidade, “grazas a este
novo servizo os clientes poderán financiar os seus gastos de 3 a 26
meses ao instante, dende o móbil e cunha tarifa moi competitiva”.
Ademais, explica, non será preciso trámite algún
nin documentación ou autorización previa por parte da entidade.
Para comezar a darlle uso, o primeiro que cómpre facer é
seleccionar dende a banca móbil a compra realizada co cartón de
crédito que desexamos aprazar (o importe deberá ir alén dos 75
euros). Logo, hai que seleccionar o número de prazos máis acaido
aos nosos intereses e confirmar o financiamento.
Un dos elementos claves da ferramenta é, en
palabras de Abanca, a súa capacidade para actuar de contado. Este
carácter de inmediata, ademais, insírese na estratexia xeral de
experiencia de usuario que está a impulsar a entidade bancaria
galega: unha estratexia para axilizar e facer máis cómoda a
interrelación cliente-banco. Con esta aplicación “o cliente ten a
posibilidade de financiar unicamente co móbil, sen ter que levar a
man a tarxeta de coordenadas ou calquera outro elemento de
identificación”, engade Abanca, salientando tamén que “cada vez
que o cliente faga unha operación coa tarxeta de crédito
susceptíbel de adiamento, recibirá unha notificación na súa banca
móbil lembrándolle que pode financiala a través do noso servizo”.