Abanca estrea unha solución de pagamentos de móbil a móbil
xoves, 31 de marzo do 2016
- Eduardo Aldao explicou o funcionamento de ABANCA Pay nunha rolda de prensa celebrada esta mañá na Coruña
Abanca leva anos facendo unha grande aposta polo contorno
móbil, e ao igual que pode presumir de ter a
única aplicación de banca móbil certificada por ILUNION e de ser unha
das primeiras entidades bancarias que empregará Samsung Pay no seu desembarco
español, agora lanza unha aplicación que permite realizar pagamentos
inmediatos de balde a calquera usuario bancario nacional e europeo, teña ou non
teléfono.
ABANCA Pay
permite realizar pagamentos de até 150 euros por operación, sen comisións, a
calquera persoa e de calquera entidade bancaria, simplemente introducindo na
aplicación o seu número de teléfono ou o seu correo electrónico, facendo “máis
sinxela a vida aos nosos clientes, facilitándolles as súas transaccións diarias”,
segundo explicou esta mañá en rolda de prensa o director de Innovación de
Abanca, Eduardo Aldao, quen explicou pormenorizadamente o funcionamento desta
nova ferramenta.
- Jorge Blanco, xerente de medios de pagamento de Abanca, destaca o feito de que con ABANCA Pay non é preciso contar co número de conta bancaria do receptor dos pagamentos
Pola súa banda, o xerente de medios de pagamento de Abanca, Jorge Blanco,
destacou que “non é necesario pedir o número de conta a ninguén, nin é preciso
que pertenza á mesma entidade. Con esta aplicación o cliente poderá enviar e
recibir cartos dos seus amigos ou compañeiros de traballo de xeito instantáneo”,
cando menos se o destino é un banco asociado, mentres que para o resto de
asociados a demora será a mesma que a de calquera outra transferencia bancaria.
A aplicación de ABANCA Pay está asociada á conta de banca electrónica do
cliente, e para realizar un pagamento só hai que seleccionar o contacto na
axenda do móbil, e indicar o importe e o concepto da operación, que farase
efectiva no mesmo momento da súa autorización, non sendo preciso que o receptor
teña que instalar a aplicación (xa que recibe as instrucións pertinentes para
facer efectivo o pagamento recibido).
Esta plataforma de pagamentos está conectada con outros bancos a través da rede
EALIA, desenvolvida por CECA, e goza con todas as garantías de seguridade.
A aplicación de ABANCA Pay pode descargarse
de balde da App Store e de
Google Play, tras o que o usuario poderá rexistrarse na aplicación para
poder empregar a súa conta de banda electrónica para enviar pagamentos aos seus
coñecidos dun xeito áxil e sinxelo, de xeito que se fai doado a realización de
pagamentos entre particulares sen ter que achegarse a un caixeiro automático ou
ter a cantidade exacta a pagar en efectivo.
A regulación actual tamén establece límites a este tipo de operacións, que
serán de 150 euros por transferencia, 300 euros/día e 3.000 euros/ano.
- ABANCA Pay incrementa o valor da banca electrónica facilitando os pagamentos entre particulares
Vídeo promocional de ABANCA Pay