APD e o seu encontro trilateral poñen o valor a cultura do dato e a Intelixencia Artificial
venres, 12 de maio do 2023
A
Asociación para o Progreso da Dirección (APD), en colaboración con
Abanca e Expense Reduction Analyst celebrou este xoves 11 de maio en
Santiago o segundo Encontro Trilateral APD, entre Galicia, Asturias e
Castela e León. A apertura do encontro, no que participaron preto
dun cento de empresas, realizárona Francisco Botas, presidente da
zona noroeste de APD, Eva Rodríguez, presidenta en Asturias de APD
e Carlos Moro, presidente en Castela e León de APD. Os tres
presidentes incidiron na colaboración para xerar un tecido produtivo
resiliente, innovador e sustentábel, capaz de xerar riqueza e atraer
talento.
Logo
interviñeron o conselleiro de Economía, Francisco Conde, a
directora de EsGlobal, Cristina Manzano, e o economista José Manuel
González Páramo, que indicou que “a clave na nova contorna
xeopolítica actual pasa por investir en resiliencia”. Manzano
apuntaba tamén que ”estamos a asistir a unha rexionalización das
áreas de comercio”.No segundo panel da mañá, dedicado ao
talento, interviñeron Beatriz Escudero, directora executiva de
Pharmadus, José González, presidente de Luckia e Antonio Agrasar,
presidente da tecnolóxica compostelá Plexus. Os tres coincidían na
importancia das persoas como transformadoras das organizacións.
Escudero destacou que “hai que dedicar moitísimo tempo a estar
coas persoas, a confianza e a autonomía son conceptos claves para
achegar valor. E, por suposto, permitir o fracaso: todos nos
equivocamos”.
Desde
Plexus, Agrasar, profundou no caso da súa organización resaltando
que “evolucionamos a nosa forma de tratar ao talento, no noso caso
contamos con psicólogos no noso persoal, revisións anuais e
flexibilidade: temos case un 90% de teletraballo. Isto crea un
significado de pertenza moi complexo”.
González,
de Luckia, apuntaba a importancia de manter unha relación
bidireccional cos traballadores: “Hai que dialogar cos equipos e
saber se lles estamos ofrecendo o proxecto no que queren estar”.
A
tecnoloxía e a mobilidade foi outro dos bloques abordados xunto a
Miguel Sagredo, director executivo (CEO) de Grupo Inmapa, Alejandro
Díaz, presidente de Grupo Baldajos e Santiago Rey, director
executivo de Televés deron o seu punto de vista, moderados por
Alejandro Santos, director de Castela e León de APD. Os tres
coincidiron na importancia do dato e a IA (Intelixencia Artificial),
aínda que tamén apuntaban que non está definido o seu impacto
real. Santiago Rey quixo facer fincapé tamén en que “a cultura da
empresa é esencial para motivar a innovación dentro dos equipos,
con especial atención ás necesidades do cliente e ás novidades
externas”.
Pola
súa banda, Miguel Sagredo, CEO de Grupo Inmapa, concluía que "a
implementación do reinado do dato supuxo superar numerosos retos,
por exemplo a contratación de novos perfís, novos medios técnicos,
novos espazos de traballo. Tivémonos que poñer as pilas na
colaboración interdepartamental da empresa, o que tamén supuxo un
cambio cultural dentro da empresa”.
Alejandro
Díaz, presidente de Grupo Baldajos tamén reflexionaba sobre a
importancia do dato: “A xestión do dato é algo xa fundamental
para o noso negocio, e focalizamos na seguridade do mesmo”.
O
encontro finalizou cunha mesa sobre o reto da sustentabilidade
ambiental e social. Fernando Vázquez, senior partner para
España de Expense Reduction Analyst (ERA) moderou este debate xunto
a Pedro Ruiz, director executivo de Alma Carraovejas, Carmen Lence,
directora executivo de Grupo Leche Río, e Jesús Alonso, director
executivo de Idesa.
Carmen
Lence quixo incidir na importancia de ser sustentábel: “Ser
sustentábel non nos vai dar máis opcións de compra, pero se non o
es, vas na túa contra”. Pola súa banda, o CEO de IDESA, Jesús
Alonso apuntou que “temos potencial para converternos nunha
primeira potencia en eólica mariña. Nós non temos nin petróleo
nin gas, e debemos dar o primeiro paso en aproveitar as enerxías
renovábeis que non só van mellorar a competitivade das empresas,
senón toda a sociedade”.
Pedro
Ruiz, de Alma Carraovejas, destacaba a filosofía que marca a
organización: “Todos os proxectos témolos en municipios do medio
rural. Nós queremos que as persoas sintan que forman parte dun
proxecto compartido”.