AMTEGA e HPE convocan aos nosos expertos en Big Data para dar forma a tecnoloxías de eficacia comercial
luns, 14 de novembro do 2016
Incentivar e promover
colectivamente respostas dixitais que nos axuden a tirar partido
comercial da gran cantidade de información que xeramos día a día,
máis polo miúdo da información que xeramos como posíbeis
clientes. Disto, de datos masivos para despregar os recursos xustos e
ofrecérllelos a clientes reais e a demandas concretas, é
do que trata a primeira edición do Hackathon Big & Anaytics HPE,
unha iniciativa do
Centro de Excelencia en Intelixencia de Negocio de Hewlett Packard
Enterprise (CEIN) en colaboración coa Axencia de Modernización
Tecnolóxica de Galicia (AMTEGA) e Situm Technologies. O encontro
desenvolverase os días 25 e 26 de novembro de 2016 na sede das súas
oficinas na Cidade da Cultura de Galicia en Santiago de Compostela.
Este hackathon,
sinalan dende HPE, xorde do compromiso do CEIN de “potenciar e
desenvolver o sector TIC galego, involucrando a un equipo de
analistas, investigadores, universitarios, emprendedores e todo tipo
de persoas con inquietudes tecnolóxicas en Big Data &
Analytics para que compitan durante dous días no
desenvolvemento de solucións dixitais a partir dos datos de
localización da traxectoria de clientes nun centro comercial”.
Segundo engade a multinacional, as tecnoloxías materializadas ao
abeiro destas sesións terán o obxectivo común de “permitir
analizar e comprender o comportamento dos clientes, facendo
dispoñíbeis as conclusións da análise aos negocios situados no
centro comercial para que poidan adaptar a súa oferta de produtos e
servizos e explorar novas vías de atracción de clientes”.
Os integrantes dos
equipos inscritos concorrerán, ademais, nunha comida networking
con persoal do CEIN o sábado 26 na cantina da Cidade da Cultura
e recibirán un diploma acreditativo de participación emitido
por HPE. Ao peche do evento, cada equipo presentará a súa solución
e un xurado experto avaliará e seleccionará aos gañadores nas
seguintes categorías: Mellor solución global, Iniciativa máis
innovadora e Mellor proposta de valor. Os gañadores serán
elixidos por un xurado constituído por colaboradores do CEIN e
profesionais doutros sectores achegados. O horario do encontro será
de 18:00 a 20:00 horas o primeiro día e de 9:00 a 20:00 horas o
segundo. As persoas que queiran participar poden atopar toda a
información que precisen na web actualizada do hackathon.
hackathon-cein.com. A
actividade abrolla do programa de colaboración fixado por HPE e
AMTEGA ao abeiro do Pacto Dixital de Galicia, unha alianza na que se
integran 13 empresas do sector, asumindo o compromiso de “colaborar
coa Administración autonómica para situar á nosa terra como un
referente tecnolóxico na atracción de investimentos, o
desenvolvemento de proxectos con potencial tractor e a
internacionalización das PEME”.