AMTEGA activa a quinta edición do programa que permite ao alumnado galego poñerse na pel de profesionais TIC
xoves, 21 de outubro do 2021
A
Axencia para a Modernización Tecnolóxica de Galicia pon en marcha
unha nova edición do Programa Tecnólog@ por un día, que volve a
ofrecer a estudantes de 12 a 17 anos a oportunidade de experimentar,
en primeira persoa, unha xornada laboral con profesionais das
empresas do sector TIC en Galicia. A iniciativa desenvólvese no
marco do Plan de Promoción de Talento Dixital de Galicia DigiTalent.
Nesta
edición, segundo informa a axencia, retómase a presencialidade do
programa e ofreceranse 66 prazas, grazas a colaboración de 6
empresas tecnolóxicas que, xunto coa axencia, posibilitarán a
experiencia de acoller novos talentos: Altia, DXC Technology, Everis,
Inetum, Satec e Corporación Televés.
A
quinta edición, avalada polo éxito das anteriores, “brindará aos
participantes unha xornada de inmersión na realidade do traballo de
profesionais do sector TIC, que compartirán os seus proxectos,
ferramentas e coñecemos cos participantes, resolverán inquedanzas
vocacionais e darán a coñecer as capacidades que demandan as
empresas do sector”, explicou AMTEGA.
A
axencia engade que o prazo para que o persoal docente inscriba ao seu
alumnado ficará aberto até o 3 de novembro, cumprimentando o
formulario dispoñíbel no
espazo web DigiTalent, onde poderán consultar as prazas
ofertadas para cada grupo de idade por cada empresa colaboradora no
programa, así coma a súa localización. Na mesma web tamén está a
documentación de referencia para que docentes, alumnado e
profesionais das entidades colaboradoras coñezan todos os detalles
da actuación e aclaren calquera dúbida que poidan ter.
Unha
vez finalizado o período de inscrición, as prazas asignaranse
aplicando o resultado dun sorteo, e a continuación serán as
empresas as que se poñan en contacto co alumnado seleccionado para
concretar a data e horario da xornada que resulte conveniente para
ambos.
Durante
os meses de novembro e decembro, as entidades colaboradoras acollerán
nas súas instalacións aos participantes, que poderán coñecer así
de primeira man as dinámicas das profesións TIC, e participar
directamente en actividades que os profesionais teñan na súa axenda
como sesións de traballo, reunións con clientes e socios
tecnolóxicos, etc.