AJE Galicia organiza un curso de verán sobre as vantaxes empresariais das redes sociais

AJE Galicia, logo do congreso celebrado a semana pasada (dirixido a salientar a importancia de innovar mesmo cando todo se poña na contra da innovación), volve á liña de actividade formativa e divulgativa cun curso de verán sobre esas ferramentas que están a cambiar o noso xeito de comunicármonos e informármonos e mesmo (sempre e cando se usen con tino) de facermos empresa e mercado. Falamos das redes sociais. O curso, de doce horas, está dirixido a calquera profesional, pequena ou mediana empresa ou estudante que precise actualizar os seus coñecementos e traballar de xeito eficaz nas comunidades e servizos 2.0, tirando partido da promoción en liña.
A actividade desenvolverase os días 30 e 31 de xullo e será impartido pola empresa Creativatotal, que aproveitará a oportunidade para amosar polo miúdo os segredos e as potencialidades das ferramentas 2.0, os móbiles , os servizos de xeoposicionamento e as novas contornas de comunicación na empresa. O Curso de Verán Redes Sociais e Marketing online inclúe un programa moi vinculado ás novas estratexias de negocio e a creación dun plan de comunicación facendo fincapé en ferramentas específicas 2.0 como Facebook (perfís, páxinas e grupos, contidos e xestión), Twitter (contas, xestión de listaxes, hashtags e estratexia), Linkedin, redes de posicionamento, YouTube, Google+, Pinterest, Google AdWords, móbiles, tabletas, xeoposicionamento, etc. O curso será de natureza práctica e cada participante elaborará de xeito individual o seu plan de comunicación coas ferramentas aprendidas. A actividade, que terá un custe de 100 euros para asociados e 140 para non asociados, levarase a cabo na sede de AJE Galicia, no quinto andar do número 4, da rúa Manuel Núñez de Vigo.