AJE Galicia trae a Vigo ao creador de Anuntis
mércores, 27 de novembro do 2013
A Asociación de Novos
Empresarios, AJE-Galicia,
organiza este xoves 28 de novembro unha nova edición do seu ciclo de
relatorios empresariais Tribuna de líderes coa presenza de
David González Castro, cofundador de Anuntis.
O convidado, segundo apunta AJE-Galicia “un dos pioneiros en
apostar polo negocio online en España”, falará sobre a evolución
das tendencias en Internet e as claves para ter éxito na posta en
marcha dun negocio na Rede.
A organización tamén
lembra que González Castro é un emprendedor que centra a súa
actividade, principalmente, ao abeiro das novas tecnoloxías e
Internet. Froito disto é a posta en marcha de Anuntis, compañía
referente no eido da compravenda en liña, e máis a vertente
brasileira de Infojobs. Por certo que boa parte desta experiencia foi
envorcada polo propio González Castro no seu libro A Convicción,
onde amosa a súa traxectoria
como emprendedor e gran parte da historia de Anuntis, que
naceu nunha portaría de Barcelona até converterse nun negocio 100%
de internet. Sinalar que en xullo de 2013, David González saíu do
accionariado de Anuntis para emprender de novo e fundar Rede Arbor,
un grupo de investimento e incubadora de empresas tecnolóxicas. A
charla do relator desenvolverase este 28 de novembro ás 19.00 horas
na sede de AJE Galicia (Príncipe 53, 1º Oficinas 1-2) en Vigo.