AFundación presenta en Vigo novo espazo para maiores e nova plataforma dixital
venres, 24 de marzo do 2017
AFundación
(Abanca) vén de inaugurar e presentar en Vigo un novo espazo moi
acaido para favorecer o envellecemento saudábel a través do emprego
das novas tecnoloxías da información. Trátase
do Espazo+60 vigués, unha sede “multidisciplinar” con
actividades para quen teña máis de 55 anos (moitas delas, como
dixemos, relacionadas coas TIC). Amais, AFundación aproveitou a
cita para dar o coñecer o vindeiro desenvolvemento da plataforma
dixital interna AFundación TV, que será unha canle de comunicación
para os socios achegándolles pezas audiovisuais que reflictan as
actividades xeradas.
Estas
novidades foron dadas a coñecer perante os medios polo presidente de
AFundación, Miguel Ángel Escotet, e o director xerente da entidade,
Pedro Otero, que lembraron que a de Vigo é a terceira sede de
Espazo+60, logo das de Ferrol e Pontevedra.
Segundo
sinalou Escotet, Espazo+60 busca involucrar ás persoas maiores con
xente nova “en actividades do seu interese”, ademais de
visualizar e reivindicar a súa experiencia. Máis polo miúdo, a
través deste programa, os usuarios poderán participar en
actividades de lecer creativo, de formación das súas habilidades e
destrezas e compartir o seu talento e experiencia vital e
profesional.
Otero,
pola súa banda, salientou que desde a posta en marcha destes
recintos recibíronse 350 altas, unha media de tres ao día, e
baixaron a idade de incorporación dos 74 aos 68 anos. A día de
hoxe, engadiu, “hai en Vigo 950 socios, entre os 55 e os 100 anos,
sendo a nosa intención acadar nos vindeiros dous anos a cifra de
2.000 usuarios”.
O
novo Espazo+60 de Vigo dispón de catro aulas, auditorio para
conferencias, aula de cociña, zona social e dúas salas no Teatro
AFundación. Nelas forneceranse actividades sobre hábitos saudábeis,
cultura e expresión artística, formación e coñecemento, novas
tecnoloxías da información e lecer activo.
Como
dixemos, AFundación tamén anunciou perante os medios a vindeira
posta en marcha de AFundación TV, unha canle dixital interna, para
socios, que reflectirá o desenvolvemento de todo tipo de actividades
xeradas no seo da entidade divulgándoas a través da televisión
dixital en diferido ou en directo.