A web do PP de Pontevedra sofre un novo ataque de Anonymous
mércores, 10 de xullo do 2013
- Captura da web intervida, feita por Gustavo Santos / El Faro de Vigo
A web
do PP de Pontevedra ergueuse
esta mañá boicoteada de novo polo grupo Anonymous, que, como todos
sabemos xa a estas alturas, trátase dunha fronte internacional de
ciberactivistas con diferentes ideoloxías antisistema e variados
niveis de cohesión e, xeralmente, unidos fronte a corporacións ou
administracións de moi variada índole. Como lembraremos, a páxina
dos populares de Pontevedra xa
foi intervida en maio coa clásica marca
da casa de Anonymous, a careta de Guy Fawkes
empregada polo protagonista da obra gráfica V de Vendetta. Porén, o
ataque deste mércores ten un cariz distinto, xa que visualmente
manifestouse na transformación da gavota branca do PP nun voitre.
Asemade, déuselle a volta ao logotipo de partido e
pintouse de negro e azul o emblema popular. Para quen non houbese
dúbida sobre a autoría dos feitos, a intervención incluíu a
seguinte mensaxe: “Somos Anonymous, somos
lexión, non perdoamos, non esquecemos, agardade por nós!”,
acompañado todo de dúas etiquetas, #CuentasDelPP e PPgoteras. Ao
mediodía, segundo informan os medios, devolvéuselle á web a súa
feitura natural.