A viguesa Citious participará no Campus de Google en Madrid
venres, 10 de xullo do 2015
A startup
viguesa Citious, creadora da aplicación do mesmo nome destinada
a facilitar mensaxería instantánea de atención ao cliente, vén de
ser seleccionada para participar no certame Google
Campus@exchange, que se vai celebrar do 13 ao 17 de xullo en
Madrid. A participación neste evento da firma galega, unha das
iniciativas impulsadas na segunda edición da aceleradora VíaVigo
(Consorcio da Zona Franca), implica que a empresa da nosa terra terá
espazo de seu entre as oito firmas B2B máis salientábeis e de
meirande proxección do ámbito estatal.
Segundo informan dende
VíaVigo, Citious foi posta en marcha por Jorge J. Rodríguez Núñez
e Pablo Gutiérrez Alfaro. No Campus de Google, engade a aceleradora,
estes emprendedores vigueses terán agora a oportunidade de aprender
dos mellores profesionais e poderán presentar o seu proxecto ante
unha gran cantidade de clientes potenciais. Nesta liña de destacar
as oportunidades da cita sitúase Pablo Gutiérrez, director
executivo da nova firma galega e enxeñeiro informático formado no
Campus de Ourense (Uvigo), que destaca que “a selección e
participación de Citious neste programa converteuse nunha gran
oportunidade de crecemento”.
A tecnoloxía
desenvolvida por Citious permite que clientes e empresas poidan
comunicarse de maneira cómoda, rápida e personalizada baseada nas
novas aplicacións de mensaxería instantánea. Segundo explican
Jorge e Pablo, “o obxectivo é dar un paso adiante na atención
tradicional aos clientes adaptando as actuais formas de comunicación
ás súas necesidades; para isto ofrecemos ás empresas a súa propia
aplicación de mensaxería instantánea para que os usuarios dos seus
servizos e produtos se comuniquen con eles de xeito cómodo, doado e
rápido”.
Respecto do Campus de
Google en Madrid, lembrar que a axenda do encontro inclúe un curso
intensivo de dirección empresarial no que os emprendedores poderán
asistir a charlas e obradoiros impartidos por profesionais de Google
e por expertos externos en materias como desenvolvemento de negocio,
mercadotecnia ou tecnoloxía.