A unidade PsiCom (USC) reforzará con tecnoloxía de seu a teleasistencia aos nosos maiores do rural
luns, 25 de marzo do 2013
- Xesús Varela Mallou, director de Miavizor / Foto: ECG
A Universidade
de Santiago deu a coñecer este luns que achegará tecnoloxía de seu
na mellora da atención a distancia aos nosos maiores. Trátase,
máis polo miúdo, de pór a disposición de 500 fogares da nosa
terra a ferramenta-proxecto chamada MiAvizor,
que consiste nun sistema de teleprevención deseñado pola Unidade de
Psicoloxía do Consumidor e Usuario (PsiCom) da USC, materializado en
orixe para o seguimento e control das persoas de idade que viven soas
en áreas do rural. Pois ben, a achega desta tecnoloxía collerá
corpo a través dun acordo da USC coa Fundación Fundación Pública
Urxencias Sanitarias de Galicia 061, que anunciou este luns a súa
adhesión ao proxecto. O obxectivo, como dixemos, é dar servizo a
500 fogares de preto de 150 concellos de Lugo e Ourense. Cóntase
para isto coa colaboración da Consellería de Traballo.
O reitor Juan Casares e a
conselleira de Sanidade e presidenta do Padroado da Fundación 061,
Rocío Mosquera, deron este luns os detalles do seu vindeiro esforzo
conxunto para a implantación de MiAvizor co piloto Vixía nos
concellos de Lugo e Ourense. O acordo suporá a instalación nos
enderezos ligados a MiAvizor dun dispositivo con feitura de medallón
ou pulseira cun premedor cuxa activación, en caso de emerxencia,
orixinará a marcación automática do número 061. “Nos casos
en que se produza esta alerta, un/unha teleoperador/a de 061 fará
unha chamada de contacto protocolizada ao teléfono de referencia da
persoa que xerara a alarma co obxecto de confirmar a localización,
identificar o motivo da alerta e clasificala, co fin de tomar as
decisións oportunas sobre a atención sanitaria a administrar”,
informaron. No acto de presentación tamén participou o coordinador
do proxecto, o profesor e director de PsiCom Jesús Varela Mallou,
que explicou que MiAvizor é un desenvolvemento intelixente integrado
por sensores sen fíos instalados no fogar “que analiza de forma
autónoma e automática a rutina da vida diaria dunha persoa,
chegando a establecer perfís e hábitos de vida que se utilizan para
o seguimento e monitorización da persoa maior no fogar”. Entre
os puntos a salientar desta
iniciativa, sen dúbida cómpre citar o seu carácter de inmediata.
De feito, calcúlase que o vindeiro mes xa estarán cubertos
250 fogares de persoas que viven soas, para entre maio e xuño
alcanzar a totalidade dos 500 domicilios que este sistema de
teleprevención quere acadar. MiAvizor afianzarase ata decembro de
2015 en 500 fogares das provincias de Lugo e Ourense, concretamente
na zona central, sur e na montaña luguesa, así como no Miño
central, comarca de Valdeorras e Terras do Sil. O sistema naceu, de
xeito específico, para o seguimento das persoas que viven soas os
seus domicilios, achegando capacidade de análise en tempo real, en
alerta as 24 horas tódolos días do ano. Así, en caso de accidente,
o sistema avisa a un familiar ou a un profesional médico de xeito
automático.
MiAvizor non require
obras nin acondicionamentos específicos, nin tampouco despregue de
fíos, xa que todos os sensores son sen fíos. “Mediante os
sensores instalados na vivenda, MiAvizor aprende e analiza cada
movemento da persoa dentro do seu fogar, ata coñecer os seus hábitos
e rutinas”, explica o profesor Jesús Varela. E engade: “A
base central recibe a información destes sensores para procesala e
analizala grazas aos seus algoritmos de intelixencia e así poder
realizar un primeiro diagnóstico en tempo real; estes
algoritmos baséanse en regras do comportamento e teoremas xa
existentes así como na experiencia de PsiCom no estudo do
comportamento”.