A transformación dixital como motor de recuperación turística foi un dos eixes do II Loop Congress React
mércores, 16 de xuño do 2021
Os
clústeres galegos TIC e de Turismo celebraron en formato presencial
(na Cidade da Cultura) e en streaming a segunda edición da
Xornada de Turismo e
Tecnoloxía Loop Congress React. Os fíos condutores do evento
foron as fórmulas para acadar a sustentabilidade e a transformación
dixital. Segundo coincidiron as relatoras e relatores, estes son os
mecanismos para conseguir a reactivación turística post-COVID.
Participaron preto de 100 profesionais.
O Loop
Congress contou con dous relatores de referencia: Yolanda Perdomo,
que foi directora da Organización Mundial do Turismo e
viceconselleira de Turismo das Illas Canarias, entre outros
organismos, e que conta con máis de 20 anos de experiencia no sector
en áreas como o desenvolvemento de produto, xestión de destinos
sustentábeis, mercadotecnia e modelos de gobernanza público-privada;
e Diego Antoñanzas de Toledo, experto en construír marcas co uso
dunha comunicación orixinal e disruptiva e que a día de hoxe centra
o seu traballo no eido do adestramento empresarial e profesional.
Yolanda
Perdomo, no seu relatorio sobre tendencias, oportunidades e novos
modelos de negocio na era post-pandémica desde unha perspectiva de
destino, falou da “necesidade dun novo modelo de goberno, que
fomente a colaboración público-privada, e fortaleza o sector
turístico desde criterios de sustentabilidade”.
Pola
súa banda, Diego Antoñanzas explicou aos participantes en Loop
Congress como reconquistar aos clientes coa transformación dixital e
convidounos a “non parar, a ter unha actitude react, a
reconstruír sen esperar a que chegue iso que chaman nova
normalidade”. Amais, tentou espertar conciencias tecnolóxicas coas
novidades do sector e coa necesidade de abrir a mente a experiencias
que reporten felicidade: “A nosa marca non é o que nós contamos
sobre ela senón o que os nosos clientes contan dela”, dixo.
O Loop
Congress acolleu tamén unha presentación de Turislab, a primeira
aceleradora de empresas de turismo de Galicia, a cargo do seu
director, David Villar; e un panel interactivo no que participaron
empresas representantes do sector con Yolanda Perdomo e Diego
Antoñanzas. Tamén interviñeron na xornada o presidente do Clúster
de Turismo de Galicia, Cesáreo González Pardal; e o vicepresidente
de pemes do Clúster TIC de Galicia, Santiago Paz Noya. A xornada foi
clausurada pola directora da Axencia de Turismo de Galicia, Nava
Castro, destacando “o papel da tecnoloxía na recuperación do
turismo” e o valor da análise de información a gran escala, o que
se coñece como Big Data, no
desenvolvemento do sector.