A terceira tempada de Destelo.gal encherá as redes de música galega
xoves, 25 de abril do 2019
O
portal de sesións musicais acústicas na nosa lingua, Sesións
Destelo, comezou a súa terceira tempada dende o recanto dixital de
costume, Destelo.gal. A estrea vén
da man do grupo vigués de garaxe-punk Bakarrá!, que pon a primeira
pedra da nova tempada cun semi-acústico que se verá completado en
semanas vindeiras con outras cinco actuacións únicas en
localización singulares (e inesperadas) da nosa terra. Así nolo
conta o responsábel do proxecto, Miguel Grandío, que lembra que os
vídeos da iniciativa xa sumaron 8.000 reproducións no YouTube.
Os
obxectivos para esta nova andaina son os mesmos pero reforzados e
actualizados. “A nosa idea”, explica Miguel, “é ofrecer unha
versión dun tema e dun concerto que sexa diferente á que o público
pode atopar nas salas de concertos ou nos festivais, e todo iso dende
a comodidade da pantalla dos seus computadores ou teléfonos
intelixentes”.
Destelo.gal,
un proxecto sen ánimo de lucro que naceu coa arela de “potenciar o
uso da lingua galega na música e derrubar algúns prexuízos aínda
existentes a ese respecto”, porá en xogo outras novidades que van
alén do que é estritamente musical, por exemplo a achega dun mapa
que xeolocaliza as sesións xa gravadas e onde irán aparecendo as
que están por vir. “Desta volta podemos confirmar que acabarán
tendo representación as catro provincias galegas”, engade Miguel.
Dous
anos de Sesións Destelo
As
Sesións Destelo están a piques de cumprir dous anos na Rede
axudando aos e ás melómanas a descubrir proxectos musicais en
galego. Neste tempo os seus vídeos acumulan arredor de 8.000
reproducións na súa canle de YouTube e por diante das súas cámaras
pasaron dende grupos históricos, como Ruxe-Ruxe, até bandas moi
novas que amosaron ao mundo por primeira vez o seu talento
grazas a este proxecto. Respecto do futuro, porase o foco no
crecemento das comunidades de Youtube, de Destelo.gal
e das súas presenzas nas redes sociais (Facebook, Instagram e
Twitter), onde ademais de anunciar a saída dos novos vídeos irase
compartindo contido adicional das gravacións e novas relativas á
música galega.