A terceira edición de BFAero acadou máis de 85 candidaturas
luns, 26 de outubro do 2020
Até
85
proxectos do sector aeronáutico e do ámbito UAV optan a integrarse
na terceira edición da aceleradora Business Factory Aero (BFAero),
impulsada pola Axencia Galega de Innovación (GAIN) e o IGAPE ao
abeiro do polo aeroespacial de Galicia, co obxectivo de impulsar
novas e prometedoras contribucións á mobilidade aérea intelixente
e non tripulada. Segundo informa a axencia, o peche do prazo de
solicitudes confirmou que a iniciativa foi quen de bater un récord
de participación, duplicando practicamente a cifra acadada nas dúas
anteriores convocatorias, nas que se inscribiran 54 e 40 proxectos,
respectivamente. Este ano, amais dun bo número de propostas galegas,
tamén se rexistrou unha importante cifra de proxectos de fóra, e
incluso internacionais.
Dos
85 proxectos seleccionábeis, 27 son galegos (11 da provincia da
Coruña, 9 de Pontevedra, 6 de Lugo e 1 de Ourense), 52 proceden
doutras provincias españolas (19 de Madrid, 5 de Asturias, 3 de
Barcelona, Valencia e Zaragoza, 2 de Gipuzkoa, A Rioxa, Málaga,
Valladolid e Tarragona e os restantes de Albacete, Alacante, Almería,
Castellón, Granada, Navarra, Salamanca, Santa Cruz de Tenerife e
Sevilla) e 6 deles veñen de fóra de España (dous de Portugal e os
catro restantes de Arxentina, Chile, Cuba e Francia).
Por
modalidades de proxectos, 50 deles están nunha fase inicial e polo
tanto optan ao programa de incubación e 35 queren entrar no programa
de aceleración. As áreas temáticas máis presentes nas ideas
rexistradas son a relacionada co deseño e produción (24%), a de
obtención de datos e información con drons (20%), a de tecnoloxías
habilitadoras (13%) e a de automatización (13%). GAIN e o IGAPE
engaden que a maiores hai tres proxectos que se sumaron á nova área
temática incluída este ano para solución contra a COVID-19 a
través de vehículos non tripulados.
Máis
dun cento de candidaturas
A
axencia explica tamén que este ano participaron no proceso de
inscrición máis dun cento de candidaturas, sendo as devanditas 85
as que “cumpren con todos os requirimentos”. O seguinte paso é
seren avaliadas polo comité executivo de BFAero. Só sete obterán
finalmente unha praza para participar no programa, tres delas en
incubación e catro en aceleración.
Aberta
a votación popular na web da aceleradora
Amais,
até este xoves 29 ás 14.00 horas estará aberta a votación popular
en www.bfaero.es para que o
público poida elixir os seus proxectos favoritos. As dúas propostas
que obteñan máis votos pasarán á última fase de selección e
poderán defender a súa idea ante o comité executivo xunto cun
mínimo doutras dez candidaturas que superarán este primeiro
peneirado.
“Os
resultados desta terceira edición confirman o auxe e interese que
esperta un sector tan específico como o da aeronáutica e os
vehículos non tripulados”, lembra as entidades impulsoras da
aceleradora, salientando o feito de que en apenas dous anos, BFAero
lanzase tres convocatorias nas que se presentaron case duascentas
candidaturas, 89 delas procedentes de Galicia”.
Ecosistema
BFAero
As
sete startups que sexan seleccionadas sumaranse ao ecosistema
de BFAero xunto coas doce empresas xa impulsadas nas dúas anteriores
edicións e recibirán un completo plan para o desenvolvemento e
lanzamento do seu produto ou servizo no mercado local, nacional e
internacional, cunha duración de 12 meses. Así, terán á súa
disposición titorías e asesoramento con expertos no sector, acceso
ás instalacións e equipos da Civil UAVs Initiative, oficina propia
e espazos para realizar coworking e recibir unha completa
formación en todos os aspectos que afecten á súa idea de negocio.
Os proxectos contarán con asesoramento tecnolóxico e acceso a
potenciais clientes de ámbito internacional. Ademais poderán dispor
de UAVs de Indra e Babcock de maneira gratuíta e de horas de voo
bonificadas. Tamén terán a opción de obter a certificación de
piloto.
Apoio
económico
Os
proxectos admitidos na aceleradora disporán do apoio económico da
Xunta. En concreto, accederán a un financiamento de ata 50.000 euros
a fondo perdido por proxecto. A maiores optarán a un apoio
financeiro en forma de préstamos de Indra (a través de
Indraventures) de entre 50.000 e 500.000 euros en incubación e sen
límite en aceleración, préstamos convertibles e tecnoloxía a
cambio de capital (Tech4Equity). Ademais, na fase de aceleración
terán acceso a préstamos participativos de ata 250.000 euros da
Xunta de Galicia a través de XesGalicia.
A
Businness Factory Aero, impulsada pola Xunta, acolle as empresas nas
súas instalacións da Fundación CEL Iniciativas por Lugo. BFAero é
un proxecto de equipo: aos membros da Xunta, que inclúen a a Axencia
Galega de Innovación (GAIN), o IGAPE e XesGalicia, súmanse
colaboradores de relevancia para garantir o éxito da iniciativa:
empresas tractoras líderes do mercado no sector como Indra ou
Babcock, o Centro Tecnolóxico de Automoción de Galicia (CTAG),
pequenas e medianas empresas relevantes polo seu coñecemento ou as
súas tecnoloxías, entidades como o Consorcio Aeronáutico de
Galicia e xeradores de coñecemento como as tres universidades
galegas.