A terceira Bolsa Nacho Mirás impulsará a innovación xornalística galega
xoves, 26 de abril do 2018
Un
ano máis, e xa van tres, imos ter Bolsa
Nacho Mirás para impulsar proxectos innovadores de comunicación de
novas e novos tituladas/os en Xornalismo. A
terceira edición da bolsa foi dada a coñecer hoxe polo Colexio
Profesional de Xornalistas de Galicia na Facultade de Ciencias da
Comunicación da Santiago, colaboradora da iniciativa. Esta, que
conta co patrocinio de ABANCA, ten unha dotación de de 6.000 euros.
Os proxectos impulsados até o de agora teñen en común a procura de
novos achados dixitais
para a nosa cultura:
tanto as propostas gañadoras da primeira edición (Mediamapa.gal,
o mapa interactivo destinado a cartografar os medios galegos, e a
iniciativa multimedia Punto e volta sobre música e baile
tradicional galegos) como a da segunda (o
documental interactivo Feira, con
presenza de seu en feira.gal).
Abriu
o acto Xosé Ramón Pousa, decano da Facultade de Ciencias da
Comunicación da USC, lembrando a figura de Nacho Mirás, un profesor
que “innovou na forma de ensinar” e ao que pola súa pegada se
lle dedicou unha aula na Facultade.
Xosé Manuel Pereiro, vicedecano do dito
Colexio, salientou que a Bolsa Nacho Mirás para novos titulados
brinda
a oportunidade
de dar os primeiros pasos na profesión
xornalística
“cun apoio que non é só económico, senón
que significa tamén un abeiro
para a posta en marcha de novos proxectos”.
O
acto acolleu tamén a presentación da iniciativa gañadora da pasada
edición da Bolsa Nacho Mirás, o
devandito audiovisual interactivo Feira, un
documental innovador
sobre a feira na Galicia contemporánea. Jorge Vázquez Herrero
presentou o proxecto que co-dirixe xunto a Laura Santos Esmorís e
destacou que “esta bolsa é unha oportunidade excepcional que xurde
no momento xusto para pór en marcha proxectos, nada mais rematar a
carreira”.