A bolsa Nacho Mirás recoñece dous destacados proxectos dixitais: Mediamapa.gal e Punto e volta
xoves, 21 de xullo do 2016
O
xurado da bolsa Nacho Mirás para novos titulados de Xornalismo vén
de dar a coñecer os seus premiados. Trátase, en primeiro lugar, do
proxecto tecnolóxico-dixital Mediamapa.gal (mapa interactivo
destinado a cartografar os medios galegos) e, a maiores, da
iniciativa multimedia Punto
e volta
(sobre música e baile tradicional galegos). A
dita bolsa vén da man do Colexio Profesional de Xornalistas de
Galicia e conta co patrocinio de Abanca e a colaboración da
Facultade de Ciencias da Comunicación da Universidade de Santiago de
Compostela.
Cada
un destes proxectos recibirá 2.500 euros para o seu desenvolvemento.
O xurado estivo formado por tres membros da xunta de goberno do CPXG
(Francisco X. González Sarria, decano; Xosé Manuel Pereiro,
vicedecano e Darío Janeiro, secretario), un representante de Abanca,
Isaac González; un representante da Facultade de Ciencias da
Comunicación da USC, Xosé López; e tres xornalistas en activo:
Ainhoa Apestegui, Xoán Soler e Fernando Varela.
Segundo
informa o Colexio de Xornalistas, Punto
e Volta
é “un proxecto multimedia que busca explorar as mudanzas sociais
que experimentou a transmisión interxeracional da cultura popular
galega a través de dúas das súas principais expresións: a música
e o baile tradicionais”. Este proceso, engade o Colexio, contarase
través “das historias das propias persoas que protagonizaron esa
mudanza, membros de distintas xeracións, mediante reportaxes,
entrevistas e videoclips accesibles na páxina web e as redes
sociais”. Alejandro Gándara Porteiro é o coordinador deste
proxecto no que tamén participan David Fontán Bestilleiro, Raquel
Pérez Vázquez e Olaia Tubío Rei.
Pola
súa banda, MediaMapa.gal quere ser “un sitio web de referencia
para coñecer o conxunto dos medios de comunicación en Galicia”.
Salienta entre outras cousas por fornecer un mapa interactivo onde os
usuarios poderán localizar todos os medios en Galicia, ver as súas
características básicas e acceder de xeito directo a eles. “O
mapa”, destaca o Colexio, “é un espazo aberto no que calquera
usuario é quen de introducir novas iniciativas mediáticas”.
Trátase dun proxecto de investigación cuxos resultados publicaranse
en aberto e con periodicidade semestral no sitio. Esta proposta foi
presentada por María Cruz Negreira Rey.
A
bolsa Nacho Mirás para novos titulados apoia proxectos xornalísticos
de novos titulados en Xornalismo ou Comunicación Audiovisual. Leva o
nome do xornalista, colexiado do CPXG e profesor na Facultade de
Ciencias da Comunicación da USC, Nacho Mirás, que en palabras do
Colexio “sempre defendeu a valía dos novos xornalistas, o espírito
de facerse valer, de formase o máximo posible e defender así o
posto de informador”.