A sétima entrega do Concurso Galego de Robótica bate récord de inscrición
luns, 9 de decembro do 2013
Temos xa á vista
unha nova edición, a sétima, do Obradoiro e Concurso Galego de
Robótica, unha máis que interesante iniciativa que vén da man dos
educadores e científicos que xuntan forzas na plataforma Igaciencia
e que se dirixe a fomentar as vocacións da nosa mocidade en materia
de intelixencia artificial, novas tecnoloxías e desenvolvementos, en
definitiva, destinados a mellorar a nosa calidade de vida, a loitar
contra doenzas e exclusións, a levar aínda máis lonxe a nosa
capacidade de comunicarnos ou a dar con xeitos alternativos (e máis
respectuosos e eficaces) de tirar enerxía da nosa contorna.
Segundo nos contan dende
Igaciencia, a nosa mocidade atesoura máis vocación científica da
que se pensa en termos xerais. Moita máis. Proba diso, é que en só
tres días de prazo de inscrición para participar no evento,
cubríronse a meirande parte das prazas dispoñíbeis con preto dun
milleiro de alumnas e alumnos. E iso que estamos a dous meses da
celebración do concurso.
Segundo nos lembran os
organizadores, o evento contará co apoio decidido de EducaBarrié,
“o espléndido cuarto andar da Fundación Barrié na Coruña”.
Este respaldo, unido ao “interese febril” amosado polos nosos
estudantes-investigadores e sumado ao compromiso e labor dos
profesores-monitores de cada un dos grupos que se presenta ao
concurso, van garantir sen dúbida que esta nova edición do Concurso
Galego de Robótica remate con éxito. E máis se temos en conta o
seu espírito tradicionalmente lúdico e as súas metodoloxías para
facer doado o aparentemente complexo (tódolos alumnos conseguen
facer programas “sorprendentes e máxicos”).
Lembrar por último que o
Concurso Galego de Robótica, en palabras do seus responsábeis “unha
nova maneira de aprender tecnoloxía e ciencia e de facer ciencia
inclusiva para todas e todos e en galego”, desenvólvese do 10 ao
14 de febreiro na Coruña.