A rede social de viaxeiros que comparten coche pon en marcha un novo servizo para atoparmos o compañeiro ideal
venres, 17 de xaneiro do 2014
A rede social líder de viaxes centrada en usuarios
de vehículos compartidos, BlaBlaCar.es,
vén de lanzar unha nova funcionalidade na súa plataforma para
aumentar a confianza entre os usuarios: os niveis de experiencia. A
partir disto, os membros da comunidade clasifícanse dende
principiantes a embaixadores, indicadores clave para facilitar, en
palabras dos responsábeis desta rede, “a elección dun acompañante
de confianza á hora de viaxar en coche compartido”. Segundo
engaden, os novos niveis de experiencia promoven a colaboración
entre os usuarios para amosar dunha primeira ollada o grao de
experiencia de cada membro da rede social.
Deste xeito, faise máis doada a procura do
compañeiro que mellor acaia ás nosas demandas e expectativas.
Lembrar que o obxectivo desta comunidade é construír a maior rede
de confianza de viaxes entre os máis de cinco millóns actuais de
usuarios da plataforma, cousa para a que se están a xerar
actualizacións continuas de perfís e valoracións feitas polos
propios usuarios sobre os compañeiros. En certa maneira, estamos
ante unha proposta semellante á de servizos como eBay, onde hai
xeitos de verificar, antes de mercar un produto, que o vendedor dese
produto non nos vai enviar unha caixa baleira ou un obxecto en mal
estado (sendo el mesmo o principal interesado en que o que mercamos
satisfaga as nosas expectativas). Isto acádase grazas a algo tan
sinxelo como as valoracións da xente.
Volvendo ao novo servizo de BlaBlaCar, dicir que,
como é lóxico, comezaremos sendo membros principiantes no intre que
nos deamos de alta na plataforma e validemos o correo. Cunha opinión
positiva e un mínimo dun mes de antigüidade, seremos usuarios
intermedios. Logo, unha vez superado este nivel e acubillando máis
de tres opinións positivas e tres meses de traxectoria na rede
social, converterémonos en avanzados. “Para chegar a ser
embaixador de BlaBlaCar”, engaden os responsábeis do servizo, “o
usuario aínda terá que pasar pola fase de experto e ter, polo
menos, 12 opinións positivas, máis de 1 ano de experiencia na
comunidade”.