A publicación anticipada dos resultados trimestrais de Google afectan á súa cotización bolsista
xoves, 18 de outubro do 2012
- Resulta evidente que o documento publicado anticipadamente era un borrador
Hoxe estaba previsto que Google publicase os seus resultados
trimestrais, agardándose que ingresase 11.860 millóns de dólares cuns beneficios
de 10,65 dólares por acción pero, en vez diso, os ingresos só foron de 11.330
millóns e cuns beneficios de 9,03 dólares por participación, o que hoxe tivo un
especial impacto na cotización bolsista da compañía porque accidentalmente
publicou os seus resultados antes do peche da Bolsa, polo que o mercado
castigou duramente a Google.
Que a publicación da nota dos resultados fiscais de Google foi accidental
resulta evidente, non só por chegar antes do debido, senón porque no texto
podía lerse unha frase na que indicaba que faltaban unhas declaracións de Larry
Page, deixando así constancia de que o documento difundido era un borrador.
A caída das accións de Google no NASDAQ foi do 9%, e dende a compañía de
Mountain View culpan do accidente a R. R. Donnelley, que tería difundido o
comunicado con 4 horas de antelación e sen a autorización de Google. Dende R.R. Donnelley aseguran estar a
investigar o acontecido.
De todos os xeitos, a caída da cotización de Google non parece estar moi
xustificada pois, como ben declarou o director xeral da empresa, Larry Page,
tiveron “un trimestre forte” cun
incremento interanual de ingresos do 51%, algo que poucas compañías poden dicir
na actual conxuntura económica.