A protección de datos persoais nas administracións, ao detalle na sede da Deputación de Lugo
mércores, 3 de abril do 2019
O
pazo provincial
da Deputación de Lugo, o pazo de San Marcos, vai acoller unha
xornada formativa sobre a protección de datos persoais na
administración pública. A cita foi presentada este mércores
polo voceiro da entidade, Álvaro Santos Ramos, quen salientou algúns
dos seus obxectivos principais: ofrecer unha visión sobre as obrigas
no cumprimento da normativa en materia de salvagarda de información
persoal nos concellos, afondando en aspectos como os conceptos xerais
da lei, as obrigas das entidades locais ou a designación da figura
do Delegado de Protección de Datos (DPD).
A
xornada, que organiza a Deputación de Lugo e a Fundación Democracia
e Goberno Local, será o vindeiro xoves 11 de abril, no salón de
actos do pazo de San Marcos, de 9:00 a 14:30 horas. O prazo de
inscrición está aberto en www.deputacionlugo.gal.
Amais
dos devanditos temas, Santos Ramos sinalou que tamén se fará
especial fincapé en afondar nas medidas de seguridade na
Administración local en relación á protección de datos persoais,
e poranse en valor as experiencias levadas a cabo na aplicación da
normativa de referencia na Deputación de Pontevedra e os novos retos
futuros en materia de rexistro electrónico, transparencia e
protección de datos na Deputación de Sevilla.
As
Xornadas sobre Protección de Datos arrancan as 9:00 horas coa
inauguración oficial a cargo do presidente da Deputación, Darío
Campos Conde, e o director da Fundación Democracia e Goberno Local,
Ramón Camp i Batalla. Ás 9:30 horas terá lugar a conferencia
Cumprimento da normativa de Protección de Datos Persoais da
Administración local, a cargo da xefa da Área do Rexistro Xeral
de Protección de Datos da Axencia Española de Protección de Datos,
Ana Vázquez Ruiz.
De
seguido, ás 12:00 horas, será a conferencia Protección de datos
persoais e medidas de seguridade na Administración local, a
cargo da licenciada en dereito e directora técnica de Datalawyers,
experta en protección de datos e seguridade da información, Eva
Rivera Fernández. As 13:00 horas, desenvolverase o relatorio
Experiencia levadas a cabo na aplicación da normativa de
protección de datos na Deputación de Pontevedra, a cargo do
delegado de Protección de Datos da Deputación de Pontevedra, Luís
Feijóo García.
As
13:45 horas, celebrarase a conferencia A Deputación de Sevilla
ante os novos retos de rexistro electrónico, transparencia e
protección de datos, a cargo do secretario xeral da Deputación
de Sevilla, Fernando Fernández-Figueroa Guerrero. Por último, ás
14:30 horas, será a clausura, a cardo do xerente da Fundación
Democracia y Gobierno Local, José Luís Moreno Torres.