A programación das Letras Galegas 2021 terá importantes ramificacións online
martes, 23 de marzo do 2021
As
Letras Galegas serán este ano unha festa de resistencia contra a
COVID. Este é fío que une as actividades (medio cento de accións)
presentadas este 23 de marzo polo Goberno galego, unha axenda
confeccionada en colaboración coa Real Academia Galega, o Consello
da Cultura de Galicia, a CRTVG e múltiples entidades e empresas que
quixeron achegar o seu gran de area á conmemoración do 17 de maio,
que este ano vai adicada á poeta Xela Arias. Boa parte das accións
serán híbridas (presencialmente limitadas pero con ampla marxe de
acción online) ou directamente envorcadas nas redes. Haberá
literatura, exposicións, deportes, música e teatro. Tamén se
prepara un videomapping que proxectará versos e imaxes da
autora en 25 emprazamentos e edificios significativos de toda
Galicia.
Na
presentación en Sarria (vila natal da escritora á que se rende
tributo) desta axenda de homenaxes a Xela Arias, Román
Rodríguez, conselleiro de Cultura e Educación, salientou o carácter
“completo e variado” da programación que pon en valor a unha
muller “comprometida e precursora” que “rompeu moldes nas nosas
letras cunha linguaxe poética urbana, vangardista e anovadora”.
Na
rolda de prensa participaron, ademais do conselleiro, o presidente da
RAG, Víctor F. Freixanes; a presidenta do Consello da Cultura
Galega, Rosario Álvarez Blanco; o director de Proxección Social da
CRTVG, Xaime Arias, e parte da súa familia como a súa nai, Amparo,
e o seu irmán Lois, o seu fillo Darío Gil Arias ou a súa parella
Xulio Gil.
Exposicións
en distintos puntos de Galicia
A
programación prevista como homenaxe a Xela Arias abrangue unha chea
de iniciativas de participación social e cultural, de fomento da
igualdade e a integración, accións musicais e actividades no
ensino, nos concellos e tamén haberá actividades para os galegos no
exterior.
No
eido artístico, a Xunta promove iniciativas como a exposición Xela
Arias. Asinamos ser libres, que fará parada en dez concellos
galegos difundindo detalles da vida, obra e o contexto histórico no
que viviu a homenaxeada; ou Aquela nena de Sarria, que
recalará na Biblioteca de Lugo e repasará as súas orixes e a súa
nenez nesta vila lucense.
Tamén
se promoverá, da man do seu fillo Darío Gil, outra mostra
fotográfica con preto de medio cento de pezas titulada Tigres
coma cabalos inspirado no poemario da autora. Chegará ás
cidades de Vigo e Santiago e irá acompañada dunha reedición do
libro en formato catálogo expositivo. Ademais, a Biblioteca de
Galicia celebrará o Día da Letras Galegas cunha exposición na que
se dará a coñecer o fondo bibliográfico que custodia da autora e
haberá tamén distintas mostras bibliográficas pola rede de
bibliotecas públicas.
De
maneira virtual, tamén se celebrará a iniciativa Xela Arias.
Fotogalerías. Retratos de autor. Trátase dunha proposta que
se poderá ver no Portal da Lingua
Galega da Secretaría Xeral de Política Lingüística, que
ofrecerá a partir de abril unha fotogalería con preto de 30 imaxes
da poeta de Xulio Gil, autor dalgúns dos retratos máis coñecidos
de Xela Arias. Estas imaxes completaranse cunha fotogalería inédita
da infancia e adolescencia da autora para que o profesorado e o
alumnado dos centros escolares galegos poidan botar man delas.
Propostas
no eido educativo
Desde
o punto de vista académico, manteranse este ano citas que son vellas
coñecidas como a Xornada do Día das Letras Galegas, nas que
desde a Consellería de Educación brindarase ao profesorado non
universitario ferramentas para abordar a figura da artista nas aulas
ou o simposio organizado en novembro pola Xunta e a Real Academia
Galega (RAG) centrado na súa figura e dirixido sobre todo a
profesorado de lingua galega e literatura dos distintos niveis
educativos.
Pola
súa banda, os equipos de dinamización da lingua galega dos centros
educativos de Galicia tamén impulsan iniciativas e elaboran recursos
para dar a coñecer a autora homenaxeada, a súa obra e o seu
compromiso coa lingua galega. Unidades didácticas, calendarios,
marcapáxinas, crebacabezas, presentacións, xincanas, exposicións,
festivais, pasapalabras, vídeos, podcast, telexornais,
cancións ou videopoemas son algunhas das propostas que se van
desenvolver en colexios e institutos de toda Galicia.
O
IES Xelmírez II de Santiago de Compostela, no que a autora exerceu a
docencia, prepara unha xornada que celebrará o 18 de maio coa
participación de María Xesús Nogueira e de Fernando Abreu.
Pola
súa banda, o IES Castelao de Vigo programou oito citas que estenden
a celebración neste centro no que estudou a poeta do 16 de abril ao
21 de maio, con lecturas de poemas, actuacións musicais, relatorios
e charlas-coloquios arredor de Xela Arias, obradoiros e conferencias,
que lle achegarán ao alumnado a figura, vida e obra da poeta, da man
de moitas persoas das que mellor a coñeceron.
A
programación das Letras Galegas 2021 incluirá tamén certames de
relato, de debuxo, de podcast, banda deseñada, fotografía e mesmo o
concurso de rap en galego Lingua de Rapear,
impulsado por Política Lingüística e a Dirección Xeral de
Xuventude.
Asemade,
apostarase por accións de fomento da lectura e o coñecemento da
obra de Xela Arias entre os máis novos, dentro e fóra do ámbito
educativo.
Máis
accións en formato dixital
Segundo
confirmou Román Rodríguez, este ano haberá
unha “forte presenza dixital ou audiovisual, tendo en conta o
actual contexto sanitario”. Como por
exemplo a
vertente dixital do proxecto
Vencerse é cousa de se tratar,
que inclúe un espectáculo poético-musical que fai realidade o
desexo de Xela Arias de levar ao escenario a súa derradeira obra,
Intempériome,
un proxecto que nunca puido ver cumprido.
Ademais,
a Cidade da Cultura acollerá en maio unha actividade de lectura
participativa para difundir nas redes a obra de Xela Arias coa que se
realizará unha peza audiovisual para visibilizar nas redes sociais.
Tamén
destaca a elaboración e difusión dunha trintena de pílulas
audiovisuais arredor de Xela Arias con testemuños de familiares,
amigos e persoeiros da cultura galega ou, tamén, un innovador
proxecto de videomapping que proxectará versos e imaxes da
autora en 25 edificios e emprazamentos significativos de toda
Galicia.
Ademais,
o Portal das Palabras, a web da RAG, así como o do Consello da
Cultura Galega ou da CRTVG incluirán contidos específicos no
universo vital e literario de Xela Arias.
Tamén
haberá propostas musicais. Entre outras, o 16 de maio terá lugar o
tradicional Concerto das Letras Galegas promovido polo Consello da
Cultura Galega que unirá textos e música a cargo de PicoAmperio e
Laura LaMontagne, nunha proposta estética audiovisual innovadora. Co
apoio da Xunta, a Banda da Loba lanza un novo EP Hasme Oír,
que verá a luz no mes de abril.
Participación
social e editoriais
A
programación incluirá tamén iniciativas de participación social e
empresariais. Así, ao longo do mes de maio, trens de alta velocidade
dos corredores A Coruña-Vigo e A Coruña-Ourense levarán nos
repousacabezas a imaxe institucional do Día das Letras Galegas
2021 e nas estacións de tren das cidades e os carteis gañadores
do Concurso-exposición das Letras Galegas organizado pola Xunta.
Estes carteis tamén se poderán ver, en tamaño reducido, no
interior dalgúns vagóns.
Na
véspera do Día das Letras Galegas os supermercados Gadis de Galicia
agasallarán a súa clientela, por calquera compra, cunha tirada de
30.000 libros en galego, 30.000 marcapáxinas e 60.000 bolsas de
papel conmemorativas do 17 de maio. Ademais, a Vegalsa-Eroski e a
Consellería de Cultura desenvolven un ano máis unha campaña para
promover a celebración do 17 de maio nos seus establecementos
comerciais a través de carteis e bolsas da compra conmemorativas
para homenaxear a Xela Arias.
No
eido editorial, incluirase a edición de obras inéditas, como Non
te amola!, que a autora ultimaba cando faleceu, así como
edicións especiais ou reedicións. Tamén se publicará unha
biografía, entre outras.
No exterior
As
conmemoracións estenderanse ao exterior. Así, a Rede de Centros de
Estudos Galegos e Lectorados da Xunta de Galicia súmase, desde a
programación impulsada polos 36 departamentos universitarios que a
integran repartidos por América, Europa e Asia, ao labor de difusión
da vida, figura e obra da autora homenaxeada polas Letras Galegas.
Desde
Salvador de Baía (Brasil) ata Budapest (Hungría) as actividades
especiais arredor do 17 de maio espállanse e adquiren diversidade de
formatos para achegarlle ao alumnado universitario conferencias,
charlas-coloquios, encontros, proxeccións, exposicións,
publicacións sobre Xela Arias. Toda a programación pode consultarse
no Portal da Lingua e en cultura.gal.